ഒറ്റയിരിപ്പിൽ പാക്കറ്റിലെ ചിപ്സ് മുഴുവൻ കഴിച്ചു തീർക്കുന്ന ശീലമുണ്ടോ? എങ്കിൽ ഭാവിയിൽ അത് നിങ്ങളുടെ ശ്രദ്ധ കേന്ദ്രീകരിക്കാനുള്ള കഴിവ് ഇല്ലാതാക്കുമെന്ന് വിശദീകരിക്കുകയാണ് ഓസ്ട്രേലിയയിലെ മൊനാഷ് സര്‍വകലാശാല ​ഗവേഷകർ സമീപകാലത്ത് നടത്തിയ പഠനം. റെഡി-ടു-ഈറ്റ് വിഭവങ്ങളുടെ മാർക്കറ്റ് ഇന്ന് വളരെ വലുതാണ്.

ആരോ​ഗ്യ വാർത്തകൾ കൂടുതൽ അറിയാൻ വാട്സാപ്പ് ഗ്രൂപ്പിൽ അംഗമാകൂ.

ഇവിടെ ക്ലിക്ക്  ചെയ്യുക

ഇതടക്കമുള്ള അൾട്രാ പ്രോസസ്ഡ് ഭക്ഷണങ്ങൾ (UPF) നമ്മുടെ ആരോ​ഗ്യത്തെ പലതരത്തില്‍ ബാധിക്കാമെന്ന് നിരവധി പഠനങ്ങൾ മുന്നറിയിപ്പ് നൽകിയിട്ടുണ്ട്. ഇപ്പോഴിതാ ഇവ ശ്രദ്ധ കേന്ദ്രീകരിക്കാനുള്ള നമ്മുടെ കഴിവിനെയും ബാധിക്കുമെന്ന് കണ്ടെത്തിയിരിക്കുകയാണ് ഓസ്ട്രേലിയയിലെ മൊനാഷ് സര്‍വകലാശാല ​ഗവേഷകർ.

വ്യാവസായിക പ്രക്രിയകളിലൂടെ അമിതമായി സംസ്കരിച്ച്, പോഷകഗുണം കുറഞ്ഞതും കൃത്രിമ ചേരുവകൾ (പ്രസർവേറ്റീവുകൾ, നിറങ്ങൾ, രുചിവർധിനികൾ) അടങ്ങിയതുമായ ഭക്ഷണങ്ങളാണ് അൾട്രാ-പ്രോസസ്ഡ് ഫുഡ്സ്. പാക്കറ്റിലാക്കിയ സ്നാക്സ്, മധുരപാനീയങ്ങൾ, സോഡകൾ, റെഡി-ടു-ഈറ്റ് മീലുകൾ, ഫാസ്റ്റ് ഫുഡ് എന്നിവയൊക്കെ അൾട്രാ പ്രോസസ്ഡ് ഭക്ഷണത്തിൽ പെടുന്നതാണ്. 2,100 പേർ പങ്കെടുത്ത പഠനത്തിൽ കോ​ഗ്നിറ്റീവ് പ്രവർത്തനങ്ങൾക്കൊപ്പം അവരുടെ ഭക്ഷണരീതിയും നിരീക്ഷിച്ചു.

പ്രത്യേകിച്ച് ശ്രദ്ധ കേന്ദ്രീകരിക്കാനുള്ള കഴിവും തീരുമാനമെടുക്കുന്നതിലെ വേ​ഗത, ദൈനംദിന ജോലികൾ എന്നിവയെ ഗവേഷകർ വിലയിരുത്തി. അള്‍ട്രാ പ്രോസസ്ഡ് ഭക്ഷണങ്ങള്‍ ഡയറ്റിന്റെ പ്രധാനഭാ​ഗമായിരുന്നവരിൽ ശ്രദ്ധ കേന്ദ്രീകരിക്കാനുള്ള കഴിവു കുറയുന്നതായി ​ഗവേഷകർ നിരീക്ഷിച്ചു. അള്‍ട്രാ പ്രോസസ്ഡ് ഭക്ഷണങ്ങളുടെ ഉപഭോഗം 10 ശതമാനം (ഏകദേശം ഒരു ദിവസം ഒരു പാക്കറ്റ് ചിപ്‌സ് ) കൂടുമ്പോള്‍ ശ്രദ്ധ കേന്ദ്രീകരിക്കാനുള്ള കഴിവില്‍ ഗണ്യമായ കുറവുണ്ടാക്കുന്നതായി പഠനത്തില്‍ കണ്ടെത്തി.

അൾട്രാ പ്രോസസ്ഡ് ഭക്ഷണത്തിന്റെ ഷെൽഫ് ലൈഫ് വർധിപ്പിക്കുന്നതിന് ചേർക്കുന്ന അഡിറ്റീവുകള്‍, എമല്‍സിഫയറുകള്‍, മറ്റ് വ്യാവസായിക ചേരുവകള്‍ ഭക്ഷണത്തിന്റെ രുചിയും ഘടനയും തന്നെ മാറ്റാം. ഇത് തലച്ചോറിന്റെ പ്രവർത്തനത്തെയും ബാധിക്കാമെന്ന് ​ഗവേഷകർ ചൂണ്ടിക്കാണിക്കുന്നു.

ശ്രദ്ധ കേന്ദ്രീകരിക്കാനുള്ള കഴിവു പലപ്പോഴും വൈജ്ഞാനിക തകർച്ചയുടെ ആദ്യകാല അപകടങ്ങളിലൊന്നാണ്. ശ്രദ്ധ കേന്ദ്രീകരിക്കുന്നതിൽ ക്രമേണയുണ്ടാകുന്ന ഇടിവ് പെട്ടെന്ന് ശ്രദ്ധയിൽപ്പെടണമെന്നില്ല. ഇത് പിന്നീട് ആരോ​ഗ്യ സങ്കീർണതകൾ ഉണ്ടാക്കാമെന്നും അൽഷിമേഴ്സ് അസോസിയേഷൻ ജേണലിൽ പറയുന്നു.