നല്ല ഉറക്കം ലഭിക്കാതെ പല പ്രശ്നങ്ങളും അനുഭവിക്കുന്നവർ ഏറെയാണ്. സമ്മർദം മൂലവും ചുറ്റുപാടുകളിലുണ്ടാകുന്ന മാറ്റം കൊണ്ടുമൊക്കെ ഉറക്കമില്ലായ്മ ഉണ്ടാകാറുണ്ട്. എന്നാൽ ദീർഘകാല ഇൻസോമ്നിയ അത്ര നിസാരമായി കരുതരുത്. ആഴ്ചയിൽ മൂന്നോ അതിലധികമോ രാത്രികളിൽ ഉറങ്ങാൻ സാധിക്കാതെവരുകയോ മൂന്നു മാസത്തിലധികം ഈ അവസ്ഥ നീണ്ടു നിൽക്കുകയോ ചെയ്യുന്നത് ഗുരുതരമായ ഉറക്കമില്ലായ്മയായി കരുതണം. മഗ്നീഷ്യം, കാൽസ്യം, സിങ്ക്, ചില ബി വൈറ്റമിനുകൾ തുടങ്ങിയ പോഷകങ്ങൾ ഉറക്കത്തിനു സഹായിക്കും. നല്ല ഉറക്കം ലഭിക്കാൻ സഹായിക്കുന്ന ഭക്ഷണങ്ങൾ ഏതൊക്കെയെന്ന് അറിഞ്ഞിരിക്കുന്നതും നല്ലതാണ്. 

പാൽ - പാലിൽ അടങ്ങിയ ട്രിപ്റ്റോഫാൻ, മെലാടോണിൻ എന്നിവ നല്ല ഉറക്കം സമ്മാനിക്കും. ചെറു ചൂട് പാൽ കുടിക്കുന്നത് നല്ലതാണ്. 

വാൾനട്ട് - വാൾനട്ടിൽ മെലാടോണിൻ ധാരാളമുണ്ട്. അതുകൂടാതെ വാൾനട്ടിലെ ഫാറ്റി ആസിഡുകളും ഉറക്കത്തിനു സഹായിക്കും. വാൾനട്ടിലുള്ള ആൽഫാ– ലിനോലെനിക് ആസിഡ് എന്ന ഒമേഗ 3 ഫാറ്റി ആസിഡ് ഡിഎച്ച്എ ആയി മാറും, ഇത് സെറാടോണിന്റെ ഉൽപാദനം വർധിപ്പിക്കാൻ സഹായിക്കും. 

ബാർലിഗ്രാസ് പൊടിച്ചത് - ബാർലിച്ചെടിയുടെ ഇലകൾ പൊടിച്ചത് ഉറക്കത്തിന് നല്ലതാണ്. കാൽസ്യം, ട്രിപ്റ്റോഫാൻ, സിങ്ക്, പൊട്ടാസ്യം, മഗ്നീഷ്യം തുടങ്ങി ഉറക്കം പ്രോത്സാഹിപ്പിക്കുന്ന നിരവധി സംയുക്തങ്ങൾ ഇതിലുണ്ട്. 

പഴം - മഗ്നീഷ്യം, ട്രിപ്റ്റോഫാൻ, വൈറ്റമിൻ ബി 6, അന്നജം, പൊട്ടാസ്യം ഇവയെല്ലാം അടങ്ങിയ പഴം ഉറക്കം സമ്മാനിക്കാൻ നല്ലതാണ്. 

ചിയ സീഡ്സ് - ട്രിപ്റ്റോഫാൻ ധാരാളം അടങ്ങിയ ചിയ സീഡ്സ് കുതിർത്ത് കഴിക്കുന്നത് നല്ല ഉറക്കത്തിനും മെച്ചപ്പെട്ട മാനസികാരോ​ഗ്യത്തിനും നല്ലതാണ്. 

മത്തങ്ങാക്കുരു - മത്തങ്ങാക്കുരുവിൽ നിന്ന് ട്രിപ്റ്റോഫാൻ ലഭിക്കും. ഉറക്കത്തിനു സഹായിക്കുന്ന അമിനോ ആസിഡ് ആണിത്. കൂടാതെ സിങ്ക്, കോപ്പർ, സെലെനിയം എന്നിവയും മത്താങ്ങാക്കുരുവിലുണ്ട്, ഇവയും സുഖകരമായ ഉറക്കം സമ്മാനിക്കും. 

ഈ വാര്‍ത്ത കൂടി വായിക്കൂ

അസഹ്യമായ വയറുവേദനയും നടുവേദനയും; ആർത്തവ ദിവസങ്ങളിൽ ഇതൊക്കെ പതിവല്ലേ? അല്ല, അറിയാം എൻഡോമെട്രിയോസിസ്

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ