കൊച്ചി: നടിയെ തട്ടിക്കൊണ്ടുപോയി ആക്രമിച്ച കേസില്‍ പിടിയിലായ മുഖ്യപ്രതി പെരുമ്പാവൂര്‍ സ്വദേശി സുനിയെ പൊലീസ് ആലുവയില്‍ ചോദ്യം ചെയ്യുന്നു. ആലുവ പൊലീസ് ക്ലബില്‍ ഉന്നത പൊലീസ് ഉദ്യോഗസ്ഥരുടെ സാന്നിധ്യത്തിലാണ് ചോദ്യം ചെയ്യല്‍. സുനിക്കൊപ്പം പിടിയിലായ കൂട്ടുപ്രതി കണ്ണൂര്‍ സ്വദേശി വിജേഷിനെയും ചോദ്യംചെയ്തുവരികയാണ്.
രാവിലെ എറാണാകുളം സിജെഎം കോടതിയില്‍നിന്ന് നാടകീയമായാണ് പ്രതികളെ പൊലീസ് പിടികൂടിയത്. കോടതിയില്‍ കീഴടങ്ങാന്‍ എത്തിയ പ്രതികളെ പ്രതിക്കൂട്ടില്‍നിന്ന് ബലപ്രയോഗത്തിലൂടെയാണ് പൊലീസ് സംഘം കസ്റ്റഡിയില്‍ എടുത്തത്. കോടതി ഉച്ചഭക്ഷണത്തിനു പിരിഞ്ഞ സമയത്തായിരുന്നു പ്രതികള്‍ എത്തിയത്. 
ബൈക്കില്‍ കോടതിക്കു സമീപം എത്തി മതില്‍ ചാടിക്കടന്നാണ് പ്രതികള്‍ കോടതിമുറിയിലേക്കു പ്രവേശിച്ചത്. പ്രതികളുടെ അഭിഭാഷനെ രഹസ്യമായി നിരീക്ഷിച്ച പൊലീസ് ഇവര്‍ കീഴടങ്ങാന്‍ എത്തുമെന്ന സൂചന ലഭിച്ചതിനെത്തുടര്‍ന്ന് വലിയ സന്നാഹങ്ങളുമായി കോടതി പരിസരത്ത് നിലയുറപ്പിച്ചിരുന്നു. 
പ്രതികളെ പിടികൂടിയ പൊലീസ് സംഘത്തെ മുഖ്യമന്ത്രി പിണറായി വിജയന്‍ അഭിനന്ദിച്ചു. ഇതുമായി ബന്ധപ്പെട്ട് പ്രതിപക്ഷം ഉയര്‍ത്തിയ വിമര്‍ശനങ്ങള്‍ ആരുടെ താത്പര്യങ്ങള്‍ സംരക്ഷിക്കാനാണെന്ന് ഇപ്പോള്‍ വ്യക്തമായിരിക്കുകയാണെന്ന് മുഖ്യമന്ത്രി പറഞ്ഞു. പ്രതികളെ കോടതിയില്‍ കയറി പിടിക്കേണ്ടി വന്നത് പൊലീസിനു നാണക്കേടാണെന്ന് പ്രതിപക്ഷ നേതാവ് കുറ്റപ്പെടുത്തി. കുറ്റാന്വേഷണത്തില്‍ ഗുരുതരമായ വീഴ്ച സംഭവിച്ചിട്ടുണ്ട്. പ്രതികള്‍ കൊച്ചിയില്‍ തന്നെയുണ്ടായിരുന്നുവെന്നത് പൊലീസിന്റെ ജാഗ്രതക്കുറവിനു തെളിവാണെന്നും ചെന്നിത്തല ആരോപിച്ചു.