പാൽ നമ്മുടെ നിത്യജീവിതത്തിന്റെ ഒരു ഭാ​ഗമാണ്. ചായയാണെങ്കിലും കാപ്പിയാണെങ്കിലും അൽപം പാലൊഴിക്കുന്നത് അതിന്റെ രുചിയും ​ഗുണവുമെല്ലാം കൂട്ടാൻ സഹായിക്കും. അതുകൊണ്ട് തന്നെ പാക്കറ്റ് പാൽ വീട്ടിലെ ഫ്രിഡ്ജിൽ സ്റ്റോക്ക് ഉണ്ടാകും. എന്നാൽ എത്രയൊക്കെ സൂക്ഷിച്ചാലും പാലു പിരിഞ്ഞു പോകുന്നത് പലർക്കും പതിവു സംഭവമാണ്.

പാലു പിരിഞ്ഞു പോകാതിരിക്കാൻ ചില പൊടിക്കൈകൾ പരീക്ഷിക്കാം..

• ഫാമിൽ നിന്ന് നേരിട്ട് വാങ്ങുന്നതാണെങ്കിലും പാക്കറ്റ് പാൽ ആണെങ്കിലും വാങ്ങിയ ഉടനെ തന്നെ തിളപ്പിക്കുന്നതാണ് നല്ലത്. ഇത് ബാക്ടീരിയകളുടെ വളർച്ച തടയാൻ സഹായിക്കും. പാൽ തിളപ്പിച്ചശേഷം നല്ലതു പോലെ തണുത്ത ശേഷം മാത്രം ഫ്രിഡ്ജിൽ വയ്ക്കുക.

• പലരും പാൽ ഫ്രിഡ്ജിന്റെ വാതിലിലാണ് സൂക്ഷിക്കാറുള്ളത്. എന്നാൽ ഫ്രിഡ്ജ് തുറക്കുമ്പോഴെല്ലാം വാതിലിലെ താപനിലയിൽ മാറ്റമുണ്ടാകുന്നത് പാൽ പെട്ടെന്ന് കേടാകാൻ കാരണമാകും. പകരം ഫ്രിഡ്ജിന്റെ ഉൾവശത്തുള്ള തണുപ്പ് കൂടിയ ഭാഗത്ത് പാൽ വയ്ക്കുന്നതാണ് നല്ലത്.

• പാൽ തിളപ്പിക്കാനും സൂക്ഷിക്കാനും ഉപയോഗിക്കുന്ന പാത്രങ്ങൾ വൃത്തിയുള്ളതായിരിക്കണം. പഴയ പാലിന്റെ അംശമോ സോപ്പിന്റെ അംശമോ പാത്രത്തിലുണ്ടെങ്കിൽ പാൽ പെട്ടെന്ന് പിരിഞ്ഞുപോകാൻ കാരണമാകും.

• ഫ്രിഡ്ജ് ഇല്ലാത്ത സാഹചര്യമാണെങ്കിൽ, പാൽ ഓരോ 5-6 മണിക്കൂർ കൂടുമ്പോഴും തിളപ്പിക്കുന്നത് നന്നായിരിക്കും. ഇത് പാലിന്റെ ആയുസ്സ് വർധിപ്പിക്കും. എന്നാൽ ഓരോ തവണ തിളപ്പിക്കുമ്പോഴും പാൽ പാത്രം നന്നായി അടച്ചു വയ്ക്കണം.

• നേരിട്ടുള്ള സൂര്യപ്രകാശമോ ശക്തമായ കൃത്രിമ വെളിച്ചമോ പാലിന്റെ ഗുണമേന്മ കുറയ്ക്കാൻ സാധ്യതയുണ്ട്. വെളിച്ചം തട്ടുന്നത് പാലിന്റെ രുചി മാറാനും പോഷകഗുണം നശിക്കാനും കാരണമാകും. അതിനാൽ പാൽ എപ്പോഴും ഇരുണ്ടതും തണുപ്പുള്ളതുമായ സ്ഥലത്ത് സൂക്ഷിക്കുക.

• പാൽ തിളപ്പിക്കുമ്പോൾ അല്പം വെള്ളം ചേർക്കുന്നത് പാത്രം അടിയിൽ പിടിക്കാതിരിക്കാൻ സഹായിക്കും. പാൽ പാത്രത്തിൽ നിന്ന് എടുത്ത ശേഷം ബാക്കി വന്ന പാൽ ഒരിക്കലും തിരിച്ചു പാക്കറ്റിലേക്കോ പ്രധാന പാത്രത്തിലേക്കോ ഒഴിക്കരുത്.