പ്രണയം മനസ്സില്‍ സൂക്ഷിക്കുന്നവര്‍ക്കെല്ലാം പ്രിയപ്പെട്ട മാസമാണ് ഫെബ്രുവരി. വാലന്റൈന്‍സ് ദിനം മാത്രമല്ല ആ ആഴ്ച തന്നെ ആഘോഷമാക്കാറുണ്ട് പലരും. ഫെബ്രുവരി ഏഴാം തിയതി റോസ് ഡേയില്‍ തുടങ്ങുന്നതാണ് ആഘോഷങ്ങള്‍. പ്രൊപ്പോസ് ഡേയും, ചോക്ലേറ്റ് ഡേയും, ടെഡ്ഡി ഡേയും, പ്രോമിസ് ഡേ, ഹഗ്ഗ് ഡേ എന്നിവ പിന്നിട്ട് നാളെ കിസ് ഡേ ആണ് ആഘോഷിക്കുന്നത്. വാലന്റൈന്‍സ് ദിനത്തിന്റെ തൊട്ട് തലേ ദിവസമാണ് എന്നതുകൊണ്ടുതന്നെ ഈ ദിനം കുറച്ച് എക്‌സ്ട്രാ സ്‌പെഷ്യലാണ്. പേര് സൂചിപ്പിക്കുന്നതുപോലെതന്നെ പങ്കാളികള്‍ തമ്മില്‍ ഒരു ചുംബനം സമ്മാനിച്ചാണ് ഈ ദിനം ആഘോഷിക്കുന്നത്. 

സ്‌നേഹത്തിന്റെയും കരുതലിന്റെയും വാത്സല്യത്തിന്റെയുമൊക്കെ പ്രകടനമാണ് ചുംബനം. ഒന്നും പറയാതെതന്നെ ഒരു ചുംബനത്തിലൂടെ ഒരുപാട് കാര്യങ്ങള്‍ പങ്കുവയ്ക്കാന്‍ കഴിയും. വ്യത്യസ്ത തരം ചുംബനങ്ങളും അവയുടെ അര്‍ത്ഥങ്ങളും നോക്കാം...

കവിളില്‍ നല്‍കുന്ന ചുംബനം: വാത്സല്യവും അടുപ്പവും പ്രകടിപ്പിക്കാനാണ് കവിളില്‍ ചുംബിക്കുന്നത്. സാധാരണ അടുപ്പമുള്ള ആളുകളെ കാണുമ്പോഴും അടുത്തിടപഴകുമ്പോഴുമൊക്കെ കവിളില്‍ ചുംബിക്കാറുണ്ട്. 

നെറ്റിയില്‍ ചുംബിക്കുന്നത്: സുരക്ഷിതത്വത്തിന്റെയും ആദരവിന്റെയുമൊക്കെ പ്രകടനമാണ് ഈ ചുംബനം. നീ എനിക്കൊപ്പം സുരക്ഷിതമാണെന്ന് പറയുന്നതിന്റെ അടയാളം കൂടിയാണ് നെറ്റിയില്‍ നല്‍കുന്ന ഉമ്മ. 

കൈയില്‍ ചുംബിക്കുന്നത്: ഒരു ബന്ധം ആരംഭിക്കുന്നതിനുള്ള താത്പര്യത്തിന്റെ അടയാളമാണ് കൈയില്‍ ചുംബിക്കുന്നത്. ബഹുമാനവും ആദരവും കാണിക്കുന്നതിന്റെ അടയാളമായും ഇത് ചെയ്യാറുണ്ട്. 

ഫ്രഞ്ച് കിസ്: തീവ്രവും വികാരഭരിതവുമായ ഒരു ചുംബനത്തിന്റെ രൂപമാണ് ഇത്. പരസ്പരം ആഴത്തില്‍ ആകര്‍ഷിക്കപ്പെടുമ്പോഴും സ്‌നേഹിക്കുമ്പോഴുമൊക്കെയാണ് ഫ്രഞ്ച് കിസ് ചെയ്യുന്നത്.

ഇയര്‍ ലോബ് കിസ്: പങ്കാളിയെ ഉത്തേജിപ്പിക്കുന്ന ചുംബനമാണ് ഇത്. 

കഴുത്തില്‍ ചുംബിക്കുന്നത്: കഴുത്തില്‍ ചുംബിക്കുന്നത് വഴി ലൈംഗിക ഉദ്ദേശങ്ങള്‍ ആശയവിനിമയം ചെയ്യാന്‍ കഴിയും. പരസ്പരം അഗാധമായ അഭിനിവേശമുള്ളവരാണ് കഴുത്തില്‍ ചുംബിക്കുന്നത്. 

മൂക്കില്‍ ചൂംബിക്കുന്നത്: ചുംബനങ്ങളില്‍ ഏറ്റവും ക്യൂട്ട് എന്ന് വിശേഷിപ്പിക്കുന്നതാണ് ഇത്. ആഴമായി പ്രണയിക്കുന്നവരെയാണ് ഈ ചുംബനം ആകര്‍ഷിക്കുന്നത്.

ഈ വാര്‍ത്ത കൂടി വായിക്കൂ 

സുഹൃത്തുക്കളുമായി എന്നും സംസാരിക്കണം; മൂഡ്സ്വിങ്സ് കുറയ്ക്കാം 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ