മലകയറുന്നതിനിടെ സഞ്ചാരിക്കു നേരെ ചാടി വീണ കൂറ്റന്‍ പാമ്പിനെ കണ്ട് ഞെട്ടിത്തരിച്ച് സംഘാംഗങ്ങള്‍. അപ്രതീക്ഷിതമായി പാമ്പ് ചാടി വീണതോടെ സഞ്ചാരികള്‍ അലറി വിളിച്ചു. വടക്കന്‍ തായ്‌ലന്‍ഡിലെ ചിയാങ് റായ് മലനിരകളിലാണ് സംഭവം നടന്നത്. 

ഒരുകൂട്ടം സഞ്ചാരികള്‍ മലകയറുന്നത് ചിത്രീകരിക്കുന്നതിനിടയിലാണ് നടുക്കുന്ന സംഭവം. മുന്നിലുള്ള ഇടുങ്ങിയ പാതയിലൂടെ മല കയറുന്ന യുവതിയുടെ നേരെ സമീപത്തെ പാറകളും കുറ്റിച്ചെടികളും നിറഞ്ഞ പ്രദേശത്തു നിന്ന് ഒരു പാമ്പ് ചാടി വീഴുകയായിരുന്നു.

യുവതി മുന്നോട്ട് നടന്നതിനാല്‍ അപകടം ഒഴിവായി. ആക്രമിക്കാന്‍ ലക്ഷ്യമിട്ടാകാം പാമ്പെത്തിയതെന്നാണ് നിഗമനം. പിന്നില്‍ വീഡിയോ ചിത്രീകരിച്ചിരുന്നവര്‍ പാമ്പിനെ കണ്ടതും ഭയന്ന് അലറിവിളിച്ചോടിയതും ഒന്നിച്ചായിരുന്നു. അതുകൊണ്ട് തന്നെ പാമ്പിനെ കണ്ടതിനു ശേഷമുള്ള വീഡിയോ വ്യക്തമല്ല. 

വിഷമില്ലാത്തയിനം പാമ്പായ റാറ്റ് സ്‌നേക്ക് ആണ് യുവതിക്കു നേരെ ചാടിവീണത്. എന്തായാലും പാമ്പിന്റെ ആക്രമണത്തില്‍ നിന്ന് രക്ഷപ്പെട്ട സഞ്ചാരികള്‍ അല്‍പ സമയത്തിനു ശേഷം മലകയറ്റം തുടരുകയും ചെയ്തു.