ധര്‍മസ്ഥല : പേരിടൽ ചടങ്ങിന് പിന്നാലെ ടബ്ബിലെ വെള്ളത്തിൽ കളിച്ചു തിമിർത്ത് കുറുമ്പു കാട്ടുന്ന കുട്ടിയാനയുടെ വീഡിയോ സോഷ്യൽ മീഡിയയിൽ വൈറലായി. രണ്ടു മാസം പ്രായമുള്ള ശിവാനിയെന്ന കുഞ്ഞാനയുടെ വിഡിയോയാണ് സമൂഹമാധ്യമങ്ങള്‍ ഏറ്റെടുത്തത്. 

ദക്ഷിണ കന്നഡയിലെ ധര്‍മസ്ഥലയിലെ ശ്രീമഞ്ജുനാഥ ക്ഷേത്രത്തിലാണ് ശിവാനിയുടെ പേരിടീല്‍ ചടങ്ങ് നടന്നത്. കുഞ്ഞു നെറ്റിപ്പട്ടവും കാല്‍ത്തളകളും അണിയിച്ച് കുഞ്ഞുസുന്ദരിയായിട്ടായിരുന്നു ശിവാനിയെ ചടങ്ങിനെത്തിച്ചത്. 

ചടങ്ങിന് ശേഷം  ഒരു പ്ലാസ്റ്റിക് ടബ്ബിലെ വെള്ളം തുമ്പിക്കൈ കൊണ്ടു നാലുപാടും ചിതറിച്ച് ശിവാനി ഓടിക്കളിക്കുന്ന ദൃശ്യങ്ങളാണ് വാര്‍ത്താ ഏജന്‍സിയായ എഎന്‍ഐ ട്വീറ്റ് ചെയ്തത്. ലക്ഷക്കണക്കിന് ആളുകളാണ് ഇതിനോടകം വീഡിയോ കണ്ടത്. രണ്ട് ആനകള്‍ സമീപത്തുനില്‍ക്കുന്നതും വിഡിയോയിലുണ്ട്. ജൂലൈ ഒന്നിനാണ് ശിവാനി ജനിച്ചത്.