കോട്ടയം; അടുക്കളയില്‍ കയറി ഭക്ഷണം കട്ടു തിന്നുന്ന അടുത്ത വീട്ടിലെ പൂച്ചയെ പിടിക്കാനായി മകന്‍ ഒരുക്കിയ കെണിയില്‍ വീണത് അമ്മ. പരുക്കേറ്റ് വീണ അമ്മയെ രക്ഷിക്കാന്‍ എത്തിയ അയല്‍വീട്ടിലെ രണ്ട് സ്ത്രീകള്‍ക്കും കെണി പണി കൊടുത്തു. ചെറിയ കെണി ഒന്നുമല്ല നല്ല ഒന്നാം തരം ഷോക്കിംങ് കെണിയാണ് മകന്‍ തയാറാക്കിയിരുന്നത്. പരുക്കേറ്റ അമ്മ ആശുപത്രിയില്‍ ചികിത്സയില്‍ ആയിരുന്നെന്ന് പറയുമ്പോള്‍ മനസിലാകുമല്ലോ കെണിയുടെ പവര്‍. 

കുമരകത്ത് അപ്പിത്തറ ഭാഗത്ത് കഴിഞ്ഞ ദിവസമാണ് സംഭവമുണ്ടായത്. പൂച്ചയുടെ ഭക്ഷണം മോഷണം പതിവായതോടെ സഹികെട്ട് ബസ് കണ്ടക്റ്ററായ മകന്‍ കെണി തയാറാക്കി. അടുക്കളയിലേക്ക് കയറുന്ന ഭാഗത്തേക്ക് കമ്പി വലിച്ച് വീട്ടിലെ വൈദ്യുതി കണക്ഷനില്‍ നിന്ന് എര്‍ത്ത് നല്‍കി. കെണി റെഡിയാക്കി വെച്ച് മകന്‍ അടുത്ത ദിവസം രാവിലെ ജോലിക്ക് പോയി. 

എന്നാല്‍ കെണിയെക്കുറിച്ച് അമ്മയ്ക്ക് അറിയില്ലായിരുന്നു. രാവിലെ അടുക്കള ജോലി ചെയ്യുന്നതിനിടെ അമ്മ അറിയാതെ കമ്പിയില്‍ തൊടുകയും ഷോക്കടിച്ചു നിലത്തുവീഴുകയും ചെയ്തു. ഷോക്കേറ്റു വീഴുന്നതു കണ്ട അയല്‍പക്കത്തെ രണ്ടു സ്ത്രീകള്‍ ഓടി വന്നു പിടിച്ചു മാറ്റാന്‍ ശ്രമിച്ചപ്പോള്‍ അവര്‍ക്കും ഷോക്കേറ്റു. മെഡിക്കല്‍ കോളേജ് ആശുപത്രിയില്‍ ചികിത്സയിലാണ് അമ്മ. എന്തായാലും നല്ല പണിയാണ് കെണി കൊടുത്തത്.