കോഴിക്കോട്: ഇഎസ്എ കരട് വിജ്ഞാപനത്തിന്റെ പരിധിയിൽനിന്ന് ജനവാസമേഖലകളെയും കാർഷിക ഭൂമിയെയും പൂർണ്ണമായി ഒഴിവാക്കണമെന്ന് ആവശ്യപ്പെട്ട് മലയോര മേഖലയിൽ പ്രക്ഷോഭം ശക്തമാക്കി സിപിഎം. വിഷയത്തിൽ കേന്ദ്ര-സംസ്ഥാന സർക്കാരുകളുടെ അടിയന്തര ഇടപെടൽ ആവശ്യപ്പെട്ട് സിപിഎം തിരുവമ്പാടി ഏരിയ കമ്മിറ്റിയുടെ നേതൃത്വത്തിൽ തിരുവമ്പാടി ബസ് സ്റ്റാൻഡ് പരിസരത്ത് അഹോരാത്ര സമരം സംഘടിപ്പിക്കും. ഇന്ന് വൈകുന്നേരം നാല് മണിക്ക് ആരംഭിക്കുന്ന സമരം നാളെ രാവിലെ ഒൻപത് മണി വരെ നീണ്ടുനിൽക്കും. മലയോര കർഷകരെയും സാധാരണക്കാരെയും ആശങ്കയിലാഴ്ത്തുന്ന നിയന്ത്രണങ്ങൾക്കെതിരെ വൻ ജനകീയ പങ്കാളിത്തത്തോടെയാണ് പ്രതിഷേധം സംഘടിപ്പിച്ചിരിക്കുന്നത്.

കേന്ദ്ര സർക്കാരിന്റെ ജനവിരുദ്ധ നയങ്ങൾ മലയോര കർഷക സമൂഹത്തെ ദുരിതത്തിലേക്ക് തള്ളിവിടുകയാണെന്ന് സിപിഎം തിരുവമ്പാടി ഏരിയ സെക്രട്ടറി വികെ വിനോദ് കുറ്റപ്പെടുത്തി. കരട് വിജ്ഞാപനത്തിനെതിരെ മറ്റ് സംസ്ഥാനങ്ങൾ ശക്തമായ പ്രതിരോധ നടപടികൾ സ്വീകരിച്ചപ്പോൾ കേരള സർക്കാരിന്റെ ഭാഗത്തുനിന്നുണ്ടായ നിഷ്ക്രിയ സമീപനം കരട് വിജ്ഞാപനം സ്ഥിരം നിയമമായി മാറുന്ന അപകടകരമായ സാഹചര്യമാണ് സൃഷ്ടിച്ചിരിക്കുന്നതെന്നും അദ്ദേഹം ആരോപിച്ചു. ഈ വിജ്ഞാപനം പ്രാബല്യത്തിൽ വരികയാണെങ്കിൽ പശ്ചിമഘട്ട മേഖലയിലുള്ള പതിനായിരക്കണക്കിന് കുടുംബങ്ങളുടെ ജീവിതവും ഭൂമിയുടെ ഉടമസ്ഥാവകാശവും ഉപജീവനമാർഗ്ഗങ്ങളും തകിടം മറിയുമെന്നും അദ്ദേഹം മുന്നറിയിപ്പ് നൽകി.

വനംവകുപ്പുമായി സഹകരിച്ച് കൃഷിവകുപ്പ് ചൊവ്വാഴ്ച തിരുവമ്പാടിയിൽ സംഘടിപ്പിക്കുന്ന സംസ്ഥാനതല മനുഷ്യ-വന്യജീവി സംഘർഷ ലഘൂകരണ കോൺക്ലേവിനെയും സിപിഎം നേതൃത്വം രൂക്ഷമായി വിമർശിച്ചു. ലക്ഷക്കണക്കിന് കർഷകരുടെ നിലനിൽപ്പിനെ ബാധിക്കുന്ന ഇഎസ്എ കരട് വിജ്ഞാപന ഭീഷണിയെ പൂർണ്ണമായി അവഗണിച്ചുകൊണ്ട്, മുഖ്യമന്ത്രിയെയും മന്ത്രിമാരെയും പങ്കെടുപ്പിച്ച് ഇത്തരം ചർച്ചകൾ നടത്തുന്നത് തികച്ചും പൊള്ളയും സമയംതെറ്റിയുള്ളതുമാണെന്ന് വി.കെ. വിനോദ് ചൂണ്ടിക്കാട്ടി. ജനവാസമേഖലകളെ വനത്തിന്റെ ബഫർ സോണുകളാക്കി മാറ്റുന്ന നയങ്ങൾക്ക് നേരെ കണ്ണടച്ചുകൊണ്ട് വന്യജീവി സംഘർഷത്തെ ഒറ്റപ്പെട്ട വിഷയമായി കാണുന്നത് ഭരണപരമായ വീഴ്ചയാണെന്നും അദ്ദേഹം പറഞ്ഞു.

തിരുവമ്പാടിയെയും സമീപത്തെ ജനവാസ കേന്ദ്രങ്ങളെയും ഇഎസ്എ നിയന്ത്രണങ്ങളിൽനിന്ന് ശാശ്വതമായി ഒഴിവാക്കാൻ സർക്കാർ അടിയന്തര നിയമ-ഭരണതല നടപടികൾ സ്വീകരിക്കണമെന്നാണ് സമരക്കാരുടെ പ്രധാന ആവശ്യം. തിരുവമ്പാടി നിയമസഭാ മണ്ഡലത്തിലെ പുതുപ്പാടി, നെല്ലിപ്പൊയിൽ, കോടഞ്ചേരി, തിരുവമ്പാടി വില്ലേജുകൾ നിലവിൽ ഇഎസ്എ കരട് വിജ്ഞാപനത്തിൽ ഉൾപ്പെട്ടിട്ടുണ്ട്. കോഴിക്കോട് ജില്ലയിലെ എട്ട് ഗ്രാമപഞ്ചായത്തുകളിലായി പത്ത് വില്ലേജുകളെയാണ് പരിസ്ഥിതിലോല കരട് വിജ്ഞാപനം നേരിട്ട് ബാധിക്കുന്നത്. മലയോര ജനതയുടെ ആശങ്കകൾക്ക് പരിഹാരം കാണുന്നതുവരെ ശക്തമായ പ്രക്ഷോഭവുമായി മുന്നോട്ടുപോകാനാണ് കർഷക സംഘടനകളുടെയും രാഷ്ട്രീയ പാർട്ടികളുടെയും തീരുമാനം.