കോഴിക്കോട്: നാദാപുരം ടൗണിലെ പ്രമുഖ മൊബൈൽ ഫോൺ ഷോപ്പിൽ വൻ കവർച്ച. 92 ആപ്പിൾ ഐഫോണുകൾ ഉൾപ്പെടെ 80 ലക്ഷത്തോളം രൂപ വിലമതിക്കുന്ന നൂറിലധികം വിലകൂടിയ മൊബൈൽ ഫോണുകളാണ് മോഷ്ടിച്ചത്. ശനിയാഴ്ച രാവിലെ കടയുടമ സ്ഥാപനം തുറക്കാനെത്തിയപ്പോഴാണ് ഷട്ടറിന്റെ പൂട്ടുകൾ തകർത്ത നിലയിൽ കണ്ടെത്തിയത്. വിവരമറിഞ്ഞയുടൻ നാദാപുരം പൊലീസും വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി വിശദമായ പരിശോധന നടത്തി.

വളരെ ആസൂത്രിതമായാണ് കവർച്ചാ സംഘം മോഷണം നടത്തിയതെന്ന് പൊലീസ് വ്യക്തമാക്കി. മോഷണത്തിന് മുൻപായി കടയ്ക്ക് മുന്നിലുണ്ടായിരുന്ന സിസിടിവി ക്യാമറകൾ സംഘം മറുവശത്തേക്ക് തിരിച്ചുവെച്ചിരുന്നു. ഒന്നിലധികം പേർ ഉൾപ്പെട്ട സംഘമാണ് മോഷണത്തിന് പിന്നിലെന്നാണ് പ്രാഥമിക നിഗമനം. കടയിലുണ്ടായിരുന്ന പണം മോഷ്ടാക്കൾ തൊട്ടിട്ടില്ല. പകരം വിപണിയിൽ വൻ വിലമതിപ്പുള്ള ആപ്പിൾ ഐഫോണുകൾ അടക്കമുള്ള ഏറ്റവും ഉയർന്ന ശ്രേണിയിലുള്ള പ്രീമിയം ഫോണുകൾ മാത്രമാണ് സംഘം ലക്ഷ്യമിട്ടത്. പ്രതികളെ ഉടൻ വലയിലാക്കാൻ പ്രത്യേക സംഘം രൂപീകരിച്ച് അന്വേഷണം നടക്കുകയാണെന്ന് പൊലീസ് ഉദ്യോഗസ്ഥർ അറിയിച്ചു.