പാലക്കാട്: ഒഡീഷയിൽ നിന്ന് ട്രെയിൻ മാർഗ്ഗം കേരളത്തിലേക്ക് കടത്താൻ ശ്രമിച്ച 53.45 കിലോഗ്രാം കഞ്ചാവുമായി ആറുപേർ പാലക്കാട് പിടിയിലായി. ഒലവക്കോട് റെയിൽവേ സ്റ്റേഷൻ പരിസരത്ത് ജില്ലാ ഡാൻസാഫ് സ്ക്വാഡും ഹേമാംബിക നഗർ പൊലീസും സംയുക്തമായി നടത്തിയ പരിശോധനയിലാണ് വൻ കഞ്ചാവ് ശേഖരം പിടികൂടിയത്.സംസ്ഥാനത്തേക്ക് ട്രെയിൻ മാർഗ്ഗം വൻതോതിൽ ലഹരിവസ്തുക്കൾ എത്തുന്നുണ്ടെന്ന വിവരത്തിന്റെ അടിസ്ഥാനത്തിൽ റെയിൽവേ സ്റ്റേഷനുകളിലും പരിസരങ്ങളിലും പോലീസ് കർശന നിരീക്ഷണം നടത്തിവരികയായിരുന്നു.

ഒഡീഷയിൽ നിന്ന് ട്രെയിൻ കയറി ഒലവക്കോട് റെയിൽവേ സ്റ്റേഷനിൽ എത്തിയ പ്രതികൾ വലിയ ബാഗുകളുമായി പ്ലാറ്റ്‌ഫോമിന് പുറത്തേക്ക് നടന്നുപോവുകയായിരുന്നു. ഇവരുടെ അസ്വാഭാവിക പെരുമാറ്റത്തിലും ഭാരമേറിയ ബാഗുകളിലും സംശയം തോന്നിയ ഡാൻസാഫ് സംഘവും പോലീസും തടഞ്ഞുനിർത്തി ചോദ്യം ചെയ്യുകയായിരുന്നു.തുടർന്ന് നടത്തിയ വിശദമായ പരിശോധനയിലാണ് ബാഗുകൾക്കുള്ളിൽ ഒളിപ്പിച്ച നിലയിൽ 53.45 കിലോ കഞ്ചാവ് കണ്ടെടുത്തത്. കേരളത്തിലെ പ്രാദേശിക ലഹരി വിതരണ സംഘങ്ങൾക്ക് കൈമാറാനാണ് ഇത്രയധികം കഞ്ചാവ് കൊണ്ടുവന്നതെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. റെയിൽവേ സ്റ്റേഷന് പുറത്ത് കഞ്ചാവ് ശേഖരം ഏറ്റുവാങ്ങാൻ കാത്തുനിന്ന സംഘത്തെക്കുറിച്ചും പ്രതികൾക്ക് പിന്നിൽ പ്രവർത്തിച്ച അന്തർസംസ്ഥാന ലഹരി മാഫിയയെക്കുറിച്ചും പോലീസ് അന്വേഷണം വ്യാപിപ്പിച്ചു. കസ്റ്റഡിയിലുള്ള ആറുപേർക്കെതിരെയും എൻഡിപിഎസ് വകുപ്പുകൾ പ്രകാരം കേസ് രജിസ്റ്റർ ചെയ്തു.