പാലക്കാട്: തൃത്താല ഞാങ്ങാട്ടിരിയിൽ 22 വയസ്സുകാരിയെ കിണറ്റിൽ മരിച്ച നിലയിൽ കണ്ടെത്തി. ഞാങ്ങാട്ടിരി ഒടിയൻപടി എരഞ്ഞികാവിൽ പരേതനായ സച്ചിദാനന്ദന്റെ മകൾ കൃഷ്ണപ്രിയ (22) ആണ് മരിച്ചത്.

കൃഷ്ണപ്രിയ കുറച്ചുകാലമായി മാനസിക ബുദ്ധിമുട്ടുകളെ തുടർന്ന് ചികിത്സയിലായിരുന്നുവെന്ന് തൃത്താല പൊലീസ് വ്യക്തമാക്കി. പിതാവ് നേരത്തെ മരിച്ചതിനാൽ അമ്മയും കൃഷ്ണപ്രിയയും മാത്രമാണ് വീട്ടിൽ താമസിച്ചിരുന്നത്. വെള്ളിയാഴ്ച പുലർച്ചെ അമ്മ ഉറക്കമുണർന്നപ്പോൾ മകളെ മുറിയിൽ കണ്ടില്ല. തുടർന്ന് വീടിനകത്തും പരിസരത്തും നടത്തിയ തെരച്ചിലിനൊടുവിലാണ് മൃതദേഹം വീട്ടുപറമ്പിലെ കിണറ്റിൽ കണ്ടെത്തിയത്.