തൃശ്ശൂർ: തൃശ്ശൂർ ജില്ലയിലെ വിവിധ തദ്ദേശ സ്വയംഭരണ സ്ഥാപനങ്ങളിലേക്ക് നടന്ന ഉപതെരഞ്ഞെടുപ്പുകളിൽ യുഡിഎഫിന് മികച്ച നേട്ടം. ചേലക്കരയിൽ അട്ടിമറി വിജയം നേടിയതിനൊപ്പം തങ്ങളുടെ ശക്തികേന്ദ്രങ്ങളായ സിറ്റിങ് സീറ്റുകൾ ഭൂരിപക്ഷം വർദ്ധിപ്പിച്ച് നിലനിർത്താനും യുഡിഎഫിന് സാധിച്ചു. അതേസമയം, തളിക്കുളം ഗ്രാമപഞ്ചായത്തിലും വെള്ളാങ്കല്ലൂർ ബ്ലോക്ക് പഞ്ചായത്തിലും സീറ്റുകൾ നിലനിർത്തി എൽഡിഎഫും കരുത്ത് തെളിയിച്ചു. ജില്ലയിലെ ഒരു തദ്ദേശ സ്ഥാപനത്തിലും നിലവിലെ ഭരണമാറ്റത്തിന് സാധ്യതയില്ല.

ചേലക്കര ഗ്രാമപഞ്ചായത്തിലെ പതിനാറാം വാർഡായ കുറുമലയിൽ നടന്ന വാശിയേറിയ പോരാട്ടത്തിലാണ് യുഡിഎഫ് അട്ടിമറി വിജയം സ്വന്തമാക്കിയത്. യുഡിഎഫ് സ്ഥാനാർത്ഥി രജിത നെച്ചിക്കോട്ടിൽ 73 വോട്ടുകളുടെ ഭൂരിപക്ഷത്തിൽ ഇവിടെ വിജയിച്ചു കയറി. ഈ വിജയത്തോടെ ചേലക്കര പഞ്ചായത്തിൽ യുഡിഎഫിന്റെ ആകെ കക്ഷിനില 13 ആയി ഉയർന്നു. ചാലക്കുടി നഗരസഭയിലെ ഇരുപത്തിനാലാം വാർഡായ മുനിസിപ്പൽ ഓഫീസ് ഡിവിഷൻ യുഡിഎഫ് വലിയ ഭൂരിപക്ഷത്തോടെ നിലനിർത്തി. യുഡിഎഫ് സ്ഥാനാർത്ഥി വി.ഒ. പൈലപ്പൻ 345 വോട്ടുകളുടെ ഭൂരിപക്ഷത്തിലാണ് ഇവിടെ വിജയിച്ചത്. വടക്കാഞ്ചേരി ബ്ലോക്ക് പഞ്ചായത്തിലെ തളി ഡിവിഷനിൽ രവീന്ദ്രൻ തിച്ചൂരിലൂടെ യുഡിഎഫ് തങ്ങളുടെ സിറ്റിങ് സീറ്റ് ഭദ്രമാക്കി.

വെള്ളാങ്കല്ലൂർ ബ്ലോക്ക് പഞ്ചായത്തിലെ എടതിരിഞ്ഞി ഡിവിഷൻ മികച്ച ഭൂരിപക്ഷത്തോടെ എൽഡിഎഫ് നിലനിർത്തി. എൽഡിഎഫ് സ്ഥാനാർത്ഥി വി.ആർ. രമേഷ് 946 വോട്ടുകളുടെ വൻ ഭൂരിപക്ഷത്തിലാണ് ഇവിടെ വിജയം ഉറപ്പിച്ചത്. തളിക്കുളം ഗ്രാമപഞ്ചായത്തിലെ പതിമൂന്നാം വാർഡായ ആര്യമ്പാടത്ത് സിപിഎമ്മിലെ വിജി കൃഷ്ണഘോഷ് 21 വോട്ടുകളുടെ ഭൂരിപക്ഷത്തിൽ വിജയിച്ച് എൽഡിഎഫ് സീറ്റ് നിലനിർത്തി. വടക്കാഞ്ചേരി ബ്ലോക്കിൽ ഇരുമുന്നണികളും തുല്യ അംഗബലത്തിലേക്ക് എത്തിയെങ്കിലും സാങ്കേതികമായി അവിശ്വാസ പ്രമേയം പാസ്സാക്കാൻ സാധിക്കാത്ത സാഹചര്യമായതിനാൽ ഭരണത്തിൽ മാറ്റമുണ്ടാകില്ല. ഉപതെരഞ്ഞെടുപ്പ് വിജയങ്ങളെ തുടർന്ന് ഇരുമുന്നണികളും അതത് കേന്ദ്രങ്ങളിൽ ആഹ്ലാദപ്രകടനങ്ങൾ നടത്തി.