ഞാൻ നിന്നെ കണ്ടത്

ഉയിർത്തെഴുന്നേറ്റ മൂന്നാം ദിവസമല്ല

മണ്ണിന് അടിയിലേക്ക് നീ

വീണുപോയ മൂന്ന് ദിവസങ്ങളിൽ.

ആത്മാവിനാൽ ഉപേക്ഷിക്കപ്പെട്ട്,

അപ്പവും വീഞ്ഞുമായി മുറിഞ്ഞ

ശരീരത്തിന്റെ ഇച്ഛകളറിയാതെ.

ഉപമകളാൽ സംസാരിച്ച നിന്റെ

അലങ്കാരങ്ങൾ അഴിഞ്ഞുവീണ്,

ഭാഷ മറന്നുപോയ കുട്ടിയായി.

മനുഷ്യനിൽനിന്നും പുറപ്പെട്ട്

ദൈവത്തിൽ എത്തിപ്പെടാതെ,

മണ്ണിനടിയിലെ മഹാനഗരത്തിൽ

മണ്ണിരകളോടും തേരട്ടകളോടും

സുവിശേഷം പറയുവാനാവാതെ,

അവരുടെ ഭാഷ വശമില്ലാതെ.

പൂർത്തിയാക്കാൻ ഒരു വരികൂടി വേണ്ട

കവിതയുടെ അപൂർണതപോലുള്ള

ആ ഉറക്കത്തോളം മനോഹരമാവാൻ

കഴിഞ്ഞിട്ടില്ല ഇതേവരെ ഒരു ഉയിർപ്പിനും.