ഓരോ വരിയിലും
ഓരോ ചോദ്യം.

ഡയറി എനിക്കു തന്ന്
അവന്‍
പോയ് വരാമെന്ന് ഒരു വരിയായ് പറഞ്ഞ്
നടന്നുപോയി.

ഓരോ ചോദ്യത്തിനുമുത്തരമായ്
ഓരോ മരം ഞാന്‍ നട്ടുവെച്ചു.
കൊല്ലാവസാനം തിരിച്ചു കൊടുക്കാന്‍.

അവസാന മരം
തൊടിയുടെ തലക്കല്‍
നട്ടുവന്നു.

ദൂരെനിന്നു നോക്കുമ്പോള്‍
തൊടിയൊരുഗ്രന്‍ കാട്!

തീര്‍ച്ചയായും
അവന്‍ വരുമ്പോള്‍
വഴിതെറ്റും.

മരങ്ങള്‍ക്കിടയില്‍
അവനു മാത്രം നടക്കാന്‍
നിവര്‍ന്നു കിടന്നു

കണ്ണടച്ചു കിടക്കുമ്പോള്‍
അകലെനിന്നവന്‍
വരുന്നതിന്‍ കാലൊച്ച...
ദേഹത്ത് കിരുകിരുപ്പ്!

എനിക്കിരുവശത്തും നിന്ന മരങ്ങളിലും
കിരുകിരുപ്പ്...
പൂക്കള്‍!