ബോളിവുഡിന്റെ കിങ് ഖാന്‍, ഷാരൂഖ് ഖാന്റെ ജന്‍മദിനമാണിന്ന്. എന്നത്തേയും പോലെ പ്രിയതാരത്തിന് ആശംസകള്‍ നേരാനും അദ്ദേഹത്തെ ഒരു നോക്ക് നേരില്‍ കാണാനും ആയിരക്കണക്കിന് ആരാധകരാണ് മുംബൈയിലെ വസതിയായ മന്നത്തിന് മുന്നില്‍ തടിച്ചു കൂടിയത്.

അര്‍ധരാത്രി 12 മണി തികയുന്നതിന് മുന്‍പ് തന്നെ ആരാധകര്‍ മന്നത്തിനു മുന്നിലേക്ക് എത്തി തുടങ്ങിയിരുന്നു. ഒട്ടും വൈകാതെ വീടിന്റെ ബാല്‍ക്കണിയില്‍ കിങ് ഖാന്‍ എത്തി. ആരാധകര്‍ പിറന്നാള്‍ ആശംസകള്‍ നേര്‍ന്നു. തിരിച്ച് താരം തന്റെ ആരാധകര്‍ക്കെല്ലാം ഫ്‌ലൈയിങ് കിസും എറിഞ്ഞ് കൊടുത്തു. കനത്ത സുരക്ഷയായിരുന്നു അദ്ദേഹത്തിന് ഏര്‍പ്പെടുത്തിയിരുന്നത്. 

എന്നാല്‍ എല്ലാക്കൊല്ലത്തേയും പോലെയല്ല ഷാരൂഖിന്റെ ഈ പിറന്നാള്‍. താരത്തിന് ആശംസയോടൊപ്പം ധാരാളം ട്രോളുകളും ലഭിക്കുന്നുണ്ട് എന്നതാണ് പ്രത്യേകത. ട്രോളിന് കാരണം, താരത്തിന്റെ പുതിയ ചിത്രമാണ്. 'ബിഗില്‍' എന്ന ബ്ലോക്ബസ്റ്ററിന് ശേഷം അറ്റ്‌ലി സംവിധാനം ചെയ്യുന്ന ഈ ബോളിവുഡ് ചിത്രത്തിന് 'സങ്കി' എന്നാണ് പേര് നല്‍കിയിരിക്കുന്നത്. 

ചിത്രത്തെ കുറിച്ചുള്ള ഔദ്യോഗിക പ്രഖ്യാപനം ഇന്ന് ഉണ്ടാകുമെന്നാണ് കരുതുന്നത്. പേര് സങ്കി എന്നാണെങ്കിലും ഇത് കൊണ്ട് ചിത്രം പറയുന്ന കഥയെന്താണെന്ന് വ്യക്തമല്ല. കാര്യം അറിയും മുന്‍പേ ട്രോള്‍ ലോകം പ്രവര്‍ത്തിച്ചു തുടങ്ങിയിട്ടുണ്ട്.