ആന്റണി വർ​ഗീസിനെ നായകനാക്കി ടിനു പാപ്പച്ചൻ സംവിധാനം ചെയ്ത അജ​ഗജാന്തരം തിയറ്ററുകളിൽ ആവേശം നിറയ്ക്കുകയാണ്. മികച്ച പ്രതികരണമാണ് ചിത്രത്തിന് ലഭിക്കുന്നത്. അതിനിടെ ആരാധകരുടെ അഭിപ്രായം ചോദിച്ചുകൊണ്ട് താരം ഒരു ചിത്രം സോഷ്യൽ മീഡിയയിൽ പങ്കുവച്ചിരുന്നു. അതിന് താഴെ നിരവധി പേർ ചിത്രത്തെ പ്രശംസിച്ചുകൊണ്ട് രം​ഗത്തെത്തി. അതിനിടെ ചിത്രം കാണാൻ പണം ചോദിച്ച ആരാധകന് താരം നൽകിയ മറുപടിയാണ് വൈറലാവുന്നത്. 

പെപ്പെയുടെ മറുപടി ഇങ്ങനെ

കടമായിട്ട് 500 രൂപ ​ഗൂ​ഗിൾ പേ ചെയ്യാനാണ് ആരാധകന്റെ കമന്റ്. ‘അളിയാ ഒരു 500 ജിപേ ചെയ്തു താ, പെട്രോള്‍ അടിച്ച് തിയേറ്ററില്‍ പോയി പടം കണ്ടിട്ട് വന്നിട്ട് അഭിപ്രായം ഇടാം. 500 ജനുവരി 5 ന് മുന്‍പ് സാലറി കിട്ടി കഴിഞ്ഞു തിരിച്ചു തരാം,’ - എന്നാണ് കുറിച്ചത്. തൊട്ടുപിന്നാലെ എല്ലാവരേയും ഞെട്ടിച്ചുകൊണ്ട് താരത്തിന്റെ മറുപടി എത്തി. ജിപേ നമ്പര്‍ ആവശ്യപ്പെട്ടുകൊണ്ടായിരുന്നു ആന്റണിയുടെ മറുപടി. എന്തായാലും ആരാധകന്റെ കമന്റും താരത്തിന്റെ മറുപടിയും വൈറലാവുകയാണ്. 

തിയറ്ററിൽ ആവേശമായി അജ​ഗജാന്തരം

ആന്റണി വർഗീസിന്റെ കരിയറിലെ ഏറ്റവും മുതൽ മുടക്കുള്ള ചിത്രമാണ്. ഉത്സവപ്പറമ്പിലേയ്ക്ക്‌ ഒരു ആനയും പാപ്പാനും ഒപ്പം ഒരു കൂട്ടം യുവാക്കളും എത്തുന്നതും തുടർന്നവിടെ 24 മണിക്കൂറിനുള്ളിൽ അരങ്ങേറുന്ന ആകാംഷ നിറഞ്ഞ സംഭവങ്ങളുമാണ്‌ ചിത്രത്തിന്റെ പ്രമേയം. അർജുൻ അശോകൻ, ചെമ്പൻ വിനോദ് ജോസ്, സാബു മോൻ, ജാഫർ ഇടുക്കി, രാജേഷ് ശർമ, സുധി കോപ്പ, വിനീത് വിശ്വം, ലുക്മാൻ, കിച്ചു ടെല്ലസ്, ശ്രീരഞ്ജിനി തുടങ്ങിയ വലിയൊരു താരനിര ചിത്രത്തിൽ കഥാപാത്രങ്ങളായി എത്തുന്നുണ്ട്.