വിടപറഞ്ഞ അച്ഛന്റെ ഓർമകളുമായി നടിയും നർത്തകിയുമായി വിദ്യ ഉണ്ണി. അച്ഛനില്ലാത്ത 90 ദിവസം അതികഠിനമായിരുന്നു എന്നാണ് വിദ്യ കുറിക്കുന്നത്. തന്റെ ജീവിതത്തിന്റെ വെളിച്ചത്തെയാണ് നഷ്ടപ്പെട്ടിരിക്കുന്നതെന്നും ഒരിക്കലും പഴയപോലെയാകാൻ തനിക്കാവില്ലെന്നും താരം കുറിച്ചു. അച്ഛനൊപ്പമുള്ള ചിത്രങ്ങൾ ഉൾപ്പെടുത്തിക്കൊണ്ടുള്ള വിഡിയോയ്ക്കൊപ്പമാണ് കുറിപ്പ്. നവംബറിലാണ് ദിവ്യ ഉണ്ണിയുടെയും വിദ്യ ഉണ്ണിയുടെയും അച്ഛൻ പൊന്നേത്ത് മഠത്തിൽ ഉണ്ണികൃഷ്ണൻ അന്തരിച്ചത്. 

വിദ്യ ഉണ്ണിയുടെ വാക്കുകൾ: 

അച്ഛനില്ലാത്ത 90 ദിവസങ്ങൾ... ഏറെ കഠിനമായിരുന്നു. എന്നും എനിക്കൊപ്പം മാർഗദീപമായി അച്ഛനുണ്ടായിരുന്നു. ഇപ്പോൾ എനിക്കാ വെളിച്ചം നഷ്ടമായിരിക്കുന്നു. ഇനിയൊന്നും പഴയതു പോലെയാകില്ല. ഞാനും ഇനിയൊരിക്കലും ആ പഴയ ഞാനാവില്ല. എന്നിൽ വിശ്വാസമർപ്പിച്ചതിനും  സ്വപ്നങ്ങളെ പിന്തുടരാൻ എന്നെ പരിശീലിപ്പിച്ചതിലും ഒരുപാടു നന്ദി. അങ്ങയുടെ മകളായി ജനിക്കാൻ കഴിഞ്ഞതിലുള്ള സൗഭാഗ്യം വിവരിക്കാൻ വാക്കുകൾ മതിയാകില്ല. ഇനിയും അങ്ങയുടെ അഭിമാനമാകാൻ ഞാൻ ശ്രമിച്ചുകൊണ്ടേയിരിക്കും.