തെലുങ്കിൽ നിന്ന് മറ്റൊരു പാൻ ഇന്ത്യൻ ചിത്രം കൂടി എത്തുന്നു. വിജയ് ദേവരകൊണ്ടയെ നായകനാക്കി പുരി ജഗന്നാഥ് സംവിധാനം ചെയ്യുന്ന ചിത്രത്തിന് ജെജിഎം എന്നാണ് പേരിട്ടിരിക്കുന്നത്. ഏപ്രിലിൽ ചിത്രീകരണം ആരംഭിക്കുന്ന സിനിമ 2023 ഓഗസ്റ്റ് 3ന് ലോകമെമ്പാടുമുള്ള തിയറ്ററുകളിൽ എത്തിക്കാനാണ് നിർമ്മാതാക്കളുടെ പദ്ധതി. മുംബൈയിൽ നടന്ന ചടങ്ങിലായിരുന്നു സിനിമയുടെ പ്രഖ്യാപനം.

മാസ് എൻറർടെയ്നർ സ്വഭാവത്തിലുള്ള ആക്ഷൻ ഡ്രാമ വിഭാഗത്തിൽ പെടുന്ന ചിത്രമാണിത്. പുരി ജഗന്നാഥ് തന്നെയാണ് രചനയും നിർവ്വഹിച്ചിരിക്കുന്നത്. ചിത്രം തെലുങ്കിനൊപ്പം തമിഴ്, കന്നഡ, മലയാളം, ഹിന്ദി ഭാഷകളിലും പ്രദർശനത്തിനെത്തും. അടുത്ത ഒരു വർഷത്തെ എന്റെ ജീവിതം എന്ന് കുറിച്ചാ‌ണ് സിനിമയുടെ വിശേഷങ്ങൾ വിജയ് ദേവരകൊണ്ട പങ്കുവച്ചത്. 

പുരി കണക്ട്, ശ്രീകര സ്റ്റുഡിയോ എന്നീ ബാനറുകളിൽ ചാർമി കൗർ, വംശി പൈഡിപ്പള്ളി, സിങ്ക റാവു, പുരി ജഗന്നാഥ് എന്നിവർ ചേർന്നാണ് ചിത്രം നിർമ്മിക്കുന്നത്.