പങ്കാളി സിബിന് ജന്മദിനാശംസകള്‍ നേര്‍ന്ന് നടിയും അവതാരകയുമായ ആര്യ. സോഷ്യല്‍ മീഡിയയില്‍ പങ്കുവച്ച കുറിപ്പിലൂടെയാണ് ആര്യ സിബിന് ആശംസകള്‍ നേരുന്നത്. കുറിപ്പിനൊപ്പം സിബിനൊപ്പമുള്ള തന്റെ ചിത്രവും മനോഹരമായൊരു വീഡിയോയും ആര്യ പങ്കുവച്ചിട്ടുണ്ട്. സിബിനൊപ്പമുള്ള മനോഹരമായ നിമിഷങ്ങളാണ് വീഡിയോയില്‍ ആര്യ ചേര്‍ത്തു വച്ചിരിക്കുന്നത്.

''ജന്മദിനാശംസകള്‍ പാര്‍ട്ണര്‍. ഖുഷിയുടെ ഡാഡ്‌സില്ലയ്ക്ക് ജന്മദിനാശംസകള്‍. എന്തൊക്കെ സംഭവിച്ചാലും, ഒടുവില്‍ നിനക്ക് അരികിലേക്ക് എത്താനാണ് ഞാന്‍ ആഗ്രഹിക്കുന്നത്. എന്റെ വീട്. എന്റെ സമാധാനത്തിന്റേയും സ്‌നേഹത്തിന്റേയും ഇടം. ഇങ്ങനെ നിലനില്‍ക്കുന്നതിന് നന്ദി'' എന്നാണ് വീഡിയോയ്‌ക്കൊപ്പം ആര്യ കുറിച്ചിരിക്കുന്നത്.

''ജന്മദിനാശംസകള്‍, എന്റെ പങ്കാളി. എന്റെ പ്രണയം. എന്റെ ബിഎഫ്എഫ്എല്‍. എന്റെ ഏറ്റവും വലിയ ശത്രു (നമ്മള്‍ അടിയുണ്ടാക്കുമ്പോള്‍). എന്റെ ഏറ്റവും വലിയ കരുത്ത് (എന്നും). എന്റെ വീട്. നമ്മുടെ കുഞ്ഞിന്റെ കൂളസ്റ്റ് ഡാഡ്‌സില്ല'' എന്ന് സിബിനൊപ്പമുള്ള ചിത്രം പങ്കുവച്ചു കൊണ്ട് ആര്യ കുറിക്കുന്നുണ്ട്. ചിത്രം പകര്‍ത്തിയത് ഖുഷിയാണ്.

ബിഗ് ബോസിലൂടെ മലയാളികള്‍ക്ക് പരിചിതനായി മാറിയ താരമാണ് സിബിന്‍. ഡിജെ, അവതാരകന്‍, ഡാന്‍സര്‍ എന്നീ നിലകളിലും സിബിന്‍ കയ്യടി നേടിയിട്ടുണ്ട്. ആര്യയും സിബിനും വര്‍ഷങ്ങളായി സുഹൃത്തുക്കളാണ്. മെയ് മാസത്തിലാണ് താനും സിബിനും വിവാഹം കഴിക്കാന്‍ പോകുന്ന കാര്യം ആര്യ അറിയിച്ചത്. ആരാധകര്‍ക്ക് സര്‍പ്രൈസായിരുന്നു ഈ വിവാഹ വാര്‍ത്ത. ഇരുവരുടേയും വിവാഹത്തിനായി കാത്തിരിക്കുകയാണ് ആരാധകര്‍.