നടി രേവതി ഇൻസ്റ്റ​ഗ്രാമിൽ പങ്കുവച്ചിരിക്കുന്ന ചിത്രമാണിപ്പോൾ സോഷ്യൽ മീ‍ഡിയയിൽ വൈറലാകുന്നത്. പുതിയ പ്രൊജക്ടിന്റെ ഭാ​ഗമായി മമ്മൂട്ടി ഡബ്ബിങ് സ്റ്റുഡിയോയിൽ എത്തിയതിന്റെ ചിത്രങ്ങളാണ് രേവതി പങ്കുവച്ചത്. മമ്മൂട്ടിയോടൊപ്പം ഓസ്‌കർ ജേതാവ് റസൂൽ പൂക്കുട്ടി, സംവിധായകൻ ശങ്കർ രാമകൃഷ്ണൻ തുടങ്ങിയവരും സ്റ്റുഡിയോയിൽ ഉണ്ടായിരുന്നു.

"അതെ സാക്ഷാൽ മമ്മൂക്ക. മിക്കവാറും എല്ലാവരും അദ്ദേഹത്തെ വിളിക്കുന്നത് അങ്ങനെയാണ്. ഒരൊറ്റ മെസേജ് അയച്ചതേയുള്ളൂ. അദ്ദേഹം വന്ന് ഞങ്ങളുടെ ഷോയെ ഒരു ഉത്സവമാക്കി മാറ്റി. റസൂൽ പൂക്കുട്ടി, ശങ്കർ രാമകൃഷ്ണൻ, ലാൽ മീഡിയയിലെ സൗണ്ട് എഞ്ചിനീയറായ സുബിൻ എന്നിവരും തങ്ങളുടേതായ സംഭാവനകൾ നൽകി കൊണ്ട് അദ്ദേഹത്തിനൊപ്പമുണ്ട്. ഇത് ഉടൻ തന്നെ നിങ്ങളുടെ മുന്നിലേക്ക് എത്തും".- എന്നാണ് രേവതി കുറിച്ചിരിക്കുന്നത്.

അതേസമയം മമ്മൂട്ടി ഡബ്ബ് ചെയ്ത ഈ പ്രൊജക്ടിനെക്കുറിച്ചുള്ള മറ്റു വിവരങ്ങളൊന്നും രേവതി പങ്കുവച്ചിട്ടില്ല. അതുകൊണ്ട് തന്നെ ഏതാണ് ആ പ്രൊജക്ട് എന്നറിയാനുള്ള കാത്തിരിപ്പിലും ആകാംക്ഷയിലുമാണ് ആരാധകർ. സംവിധായകൻ രഞ്ജിത്തും ഈ പുതിയ പ്രൊജക്ടിൽ അസോസിയേറ്റ് ചെയ്യുന്നുണ്ടെന്നാണ് പുറത്തുവരുന്ന വിവരം.

മമ്മൂട്ടി കമ്പനിയുടെ പുതിയ ഷോർട്ട് ഫിലിമായ 'ആരോ- സംവണ്ണി'നാണോ മമ്മൂക്ക ഡബ്ബ് ചെയ്യാനെത്തിയതെന്നാണ് ആരാധകരുടെ ചോദ്യം. ശ്യാമ പ്രസാദ്, മഞ്ജു വാര്യർ, അസീസ് നെടുമങ്ങാട് എന്നിവരാണ് ആരോ എന്ന ഷോർട്ട് ഫിലിമിൽ പ്രധാന വേഷങ്ങളിലെത്തുന്നത്. അടുത്തിടെ മഞ്ജു വാര്യരുടെയും ശ്യാമ പ്രസാദിന്റെയും ഫസ്റ്റ് ലുക്ക് പോസ്റ്ററും മമ്മൂട്ടി കമ്പനി പുറത്തുവിട്ടിരുന്നു.

അനൂപ് മേനോൻ, പാർവതി തിരുവോത്ത്, രഞ്ജിത്ത്, സയനോര, മഞ്ജു വാര്യർ എന്നിവരും ഡബ്ബ് ചെയ്യുന്നതിന്റെ ചിത്രങ്ങൾ കഴിഞ്ഞ ദിവസം രേവതി പങ്കുവച്ചിരുന്നു. അതേസമയം വി ആർ സുധീഷ് ആണ് ആരോയുടെ കഥയും സംഭാഷണവുമൊരുക്കിയിരിക്കുന്നത്. ബിജിബാലിന്റേതാണ് സം​ഗീത സംവിധാനം. പ്രശാന്ത് രവീന്ദ്രനാണ് ഛായാ​ഗ്രഹണമൊരുക്കുന്നത്.