നടൻ ഷൈൻ ടോം ചാക്കോ ജാതിവാലിന്റെ പേരിൽ നടത്തിയ വിമർശനം സങ്കടമുണ്ടാക്കിയെന്ന് നടി സംയുക്ത. താൻ ഏറെ പുരോഗമനപരമായി എടുത്തൊരു തീരുമാനത്തെ മറ്റൊരു സാഹചര്യവുമായി കൂട്ടിയിണക്കി സംസാരിച്ചത് വലിയ സങ്കടമുണ്ടാക്കിയെന്ന് സംയുക്ത പറഞ്ഞു. ‘വിരുപക്ഷ’ എന്ന തെലുങ്ക് സിനിമയുടെ പ്രമോഷനുമായി ബന്ധപ്പെട്ട് കൊച്ചിയിൽ മാധ്യമങ്ങളോട് സംസാരിക്കുകയായിരുന്നു നടി.

"ഞാൻ വളരെ പുരോഗമനപരമായി എടുത്തൊരു തീരുമാനമാണ് എന്റെ പേരിനൊപ്പം ജാതിവാൽ വേണ്ടെന്നത്. ഒരു സ്ഥലത്ത് ഇത് പറഞ്ഞാൽ പെട്ടെന്ന് മാറുന്ന കാര്യമല്ല. മറ്റൊരിടത്ത് ചെല്ലുമ്പോൾ എന്നെ വീണ്ടും ജാതിവാൽ ചേർത്താണ് വിളിക്കുന്നത്. ഞാൻ ഒരു സിനിമയുടെ പ്രമോഷനുമായി ബന്ധപ്പെട്ട് ചെന്നൈയിൽ പോയപ്പോൾ അവിടെയും എന്നെ ഇതുചേർത്ത് വിളിച്ചത് സത്യമായിട്ടും വളരെ അരോചകമായി തോന്നി. അങ്ങനെയാണ് ഞാനത് മാറ്റിയത്. അത് ചോദ്യം ചെയ്യപ്പെടുക എന്ന് പറയുന്നത് എനിക്ക് സങ്കടം ഉണ്ടാക്കിയ ഒരു കാര്യമാണ്. അന്ന് സംസാരിച്ച വിഷയം തന്നെ വേറെയായിരുന്നു, അതുമായി ഞാനെടുത്ത ഒരു പ്രോഗ്രസീവ് തീരുമാനത്തെ കൂട്ടിയിണക്കിയപ്പോൾ വളരെ സങ്കടം തോന്നി", സംയുക്ത പറഞ്ഞു. 

സംയുക്ത നായികയായ ചെമ്പൻ വിനോദ്, ഷൈൻ ടോം ചാക്കോ എന്നിവർ അഭിനയിച്ച ‘ബൂമറാങ്’ സിനിമയുടെ പ്രമോഷന്റെ ഭാ​ഗമായി നടന്ന പരിപാടിയിലാണ് നടിക്കെതിരെ ഷൈൻ വിമർശനമുന്നയിച്ചത്. സംയുക്ത പ്രമോഷനെത്താതിരുന്നതിന്റെ പേരിലായിരുന്നു വിമർശനം. മേനോൻ ആയാലും നായരായാലും ക്രിസ്ത്യാനി ആയാലും മുസ്‌ലിം ആയാലും ചെയ്ത ജോലി പൂർത്തിയാക്കണം എന്നാണ് ഷൈൻ പറഞ്ഞത്. 

ഈ വാര്‍ത്ത കൂടി വായിക്കൂ 

"ഒറ്റയ്ക്കാകുമ്പോഴും ഒപ്പമുള്ള കൂട്ടുകാരൻ", 'നൻപൻ'; ബാലയ്ക്കൊപ്പം പിറന്നാൾ ആഘോഷിച്ച് മുന്ന; ചിത്രങ്ങൾ 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ