നീണ്ടനാളത്തെ കാത്തിരിപ്പിനൊടുവിൽ വിജയ് ചിത്രം മാസ്റ്റർ പൊങ്കൽ തിയറ്ററിലേക്ക് എത്തുകയാണ്. പൊങ്കൽ റിലീസായി 13നാണ് ചിത്രം പ്രേക്ഷകരിലേക്ക് എത്തുന്നത്. എന്നാൽ അതിനിടെ ചിത്രത്തിന്റെ കഥ മോഷ്ടിച്ചതാണെന്ന ആരോപണവുമായി രം​ഗത്തെത്തിയിരിക്കുകയാണ് കെ രം​ഗദാസ് എന്ന വ്യക്തി. 2017 ൽ രജിസ്റ്റർ ചെയ്ത തന്റെ കഥ മോഷ്ടിച്ചു എന്നാണ് വാർത്താസമ്മേളനത്തിലൂടെ രം​ഗദാസ് ആരോപിച്ചത്. 

സൗത്ത് ഇന്ത്യന്‍ ഫിലിം റൈറ്റേഴ്സ് അസോസിയേഷനില്‍ 2017 ഏപ്രില്‍ 7 ന് താൻ കഥ രജിസ്റ്റർ ചെയ്തത്. എന്നാൽ ആ കഥ മറ്റാരോ സിനിമയാക്കിയെന്നും  വരും ദിവസങ്ങളില്‍ തെളിവുകള്‍ പുറത്തുവിടുമെന്നും ഇയാള്‍ പറഞ്ഞതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. ആദ്യമായല്ല വിജയ് ചിത്രം മോഷണ ആരോപണത്തിൽ വീഴുന്നത്. ഇതിന് മുൻപ് എആർ മുരു​ഗദോസിന്റെ സർക്കാരിനെ എതിരെ ഉയർന്ന മോഷണ ആരോപണം വലിയ വിവാദമായിരുന്നു. കൂടാതെ ബി​ഗിലും ഇത്തരത്തിലുള്ള ‌വിവാദത്തിൽപ്പെട്ടു. 

ലോകേഷ് കനകരാജ് സംവിധാനം ചെയ്യുന്ന ചിത്രത്തിൽ വിജയ് സേതുപതിയും പ്രധാന വേഷത്തിൽ എത്തുന്നുണ്ട്. മാളവിക മോഹൻ, ആൻഡ്രിയ,ശാന്തനു, ​ഗൗരി കൃഷ്ണ, അർജുൻ ദാസ്, മഹേന്ദ്രൻ എന്നിവരാണ് മറ്റു അഭിനേതാക്കൾ. ലോകേഷ് കനകരാജിന്റേതാണ് മാസ്റ്ററിന്റെ കഥ. സംവിധായകനൊപ്പം രത്നകുമാർ, പൊൻ പാർത്ഥിപൻ എന്നിവർ ചേർന്നാണ് തിരക്കഥ എഴുതിയിരിക്കുന്നത്.