ബോളിവുഡ് സൂപ്പര്‍താരം അമിതാഭ് ബച്ചനെ നായകനാക്കി സിനിമ സംവിധാനം ചെയ്യാന്‍ അജയ് ദേവ്ഗണ്‍. ആദ്യമായാണ് അജയ് ബിഗ് ബിയുടെ സംവിധായക റോളില്‍ എത്തുന്നത്. മെയ്‌ഡേ എന്ന് പേരു നല്‍കിയിരിക്കുന്ന ചിത്രത്തില്‍ അഭിനേതാവായും അജയ് ദേവ്ഗണ്‍ എത്തുന്നുണ്ട്.
ചിത്രത്തില്‍ പൈലറ്റിന്റെ റോളിലാണ് അജയ് ദേവ്ഗണ്‍ എത്തുന്നത്. എന്നാല്‍ അമിതാഭ് ബച്ചന്റെ കഥാപാത്രത്തെക്കുറിച്ചുള്ള സൂചനകളൊന്നും പുറത്തുവന്നിട്ടില്ല. ചിത്രത്തിന്റെ തിരക്കഥ പൂര്‍ത്തിയായെന്നും പ്രീ പ്രൊഡക്ഷന്‍ വര്‍ക്കുകള്‍ ആരംഭിച്ചുവെന്നുമാണ് റിപ്പോര്‍ട്ടുകള്‍. സിനിമയില്‍ അഭിനയിക്കുന്ന മറ്റ് കഥാപാത്രങ്ങളെക്കുറിച്ചും തീരുമാനമായിട്ടില്ല. ചിത്രത്തിന്റെ സംവിധായകനും അഭിനേതാവും മാത്രമല്ല നിര്‍മാണവും അജയ് ദേവ്ഗണ്‍ തന്നെയാണ്. അജയ് ദേവ്ഗണ്‍ ഫിലിംസിന്റെ ബാനറിലാണ് ചിത്രം പുറത്തെത്തുന്നത്.
ചിത്രത്തിന്റെ ഷൂട്ടിങ് ഡിസംബറില്‍ ഹൈദരാബാദില്‍ ആരംഭിക്കുമെന്നാണ് സൂചനകള്‍. ഇപ്പോല്‍ ബുജ്; ദി പ്രൈഡ് ഓഫ് ഇന്ത്യയുടെ ഷൂട്ടിങ് തിരക്കിലാണ് അജയ്. കൊന്‍ ബനേഗാ ക്രോര്‍പതിയുടെ തിരക്കിലാണ് ബിഗ് ബി ഇപ്പോള്‍. മേജര്‍ സാഹബ്, ഖാകീ, സത്യാഗ്രഹ എന്നീ സിനിമകളിലാണ് ഇതിന് മുന്‍പ് അജയും അമിതാഭ് ബച്ചനും ഒന്നിച്ചത്. 2008 ല്‍ പുറത്തിറങ്ങിയ യൂ മീ ഓര്‍ ഹം എന്ന ചിത്രത്തിലൂടെയാണ് അജയ് ആദ്യമായി സംവിധായകനാവുന്നത്. ചിത്രത്തില്‍ താരത്തിന്റെ ഭാര്യ കാജോളാണ് നായികയായി എത്തിയത്. അതിന് ശേഷം ഷിവായ് എന്ന ചിത്രവും സംവിധാനം ചെയ്തിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates