ലോകമെമ്പാടും ആരാധകരുള്ള തെന്നിന്ത്യൻ താരമാണ് അല്ലു അർജുൻ. കരിയറിലെ മികച്ചൊരു നേട്ടം സ്വന്തമാക്കിയതിന്റെ സന്തോഷത്തിലാണ് അല്ലു അർജുനിപ്പോൾ. 2025 ലെ ദാദാ സാഹെബ് ഫാൽക്കെ ഇന്റർനാഷണൽ ഫിലിം ഫെസ്റ്റിവൽ അവാർഡ്‌സിൽ അംഗീകാരം നേടിയതോടെ അല്ലു അർജുൻ തന്റെ കരിയറിൽ മറ്റൊരു നാഴികക്കല്ല് കൂടി പിന്നിട്ടിരിക്കുകയാണ്.

ഈ വർഷത്തെ ഏറ്റവും മികച്ച വേഴ്സറ്റൈൽ ആക്ടറിനുള്ള ദാദാ സാഹെബ് ഫാല്‍ക്കെ അന്താരാഷ്ട്ര ചലച്ചിത്രോത്സവ പുരസ്‌കാരമാണ് (ഡിപിഐഎഫ്എഫ്) അല്ലു അർജുനെ തേടിയെത്തിയിരിക്കുന്നത്. നടന് അഭിനന്ദനമറിയിച്ച് ഡിപിഐഎഫ്എഫ് ഔദ്യോഗിക സോഷ്യല്‍ മീഡിയാ അക്കൗണ്ടുകളില്‍ പോസ്റ്റ് പങ്കുവെച്ചിട്ടുണ്ട്.

ഒക്ടോബര്‍ 30 ന് മുംബൈയിലെ എസ് വിപി സ്റ്റേഡിയത്തില്‍ എന്‍എസ് സിഐ ഡോമിലായിരുന്നു പുരസ്‌കാര ദാന ചടങ്ങ്. പുരസ്‌കാരം ലഭിച്ചതിന് നന്ദി അറിയിച്ച് അല്ലു അര്‍ജുനും എക്‌സില്‍ പോസ്റ്റ് പങ്കുവെച്ചിട്ടുണ്ട്. അവിശ്വസനീയമായ ഈ ബഹുമതി നല്‍കിയതില്‍ അല്ലു അര്‍ജുന്‍ സംഘാടകര്‍ക്ക് നന്ദി അറിയിച്ചു.

ഈ വര്‍ഷത്തെ എല്ലാ വിഭാഗങ്ങളിലെയും പുരസ്‌കാര ജേതാക്കള്‍ക്കും അദ്ദേഹം അഭിനന്ദനം അറിയിച്ചു. പിന്തുണയും സ്‌നേഹവും നല്‍കിയ പ്രേക്ഷകരോടും ആത്മാര്‍ത്ഥമായ നന്ദിയുണ്ടെന്നും അദ്ദേഹം പറഞ്ഞു. 2025 ലെ സൗത്ത് ഇന്ത്യന്‍ ഇന്റര്‍നാഷണല്‍ മൂവി അവാര്‍ഡ്‌സില്‍ അല്ലു അര്‍ജന് മികച്ച നടനുള്ള പുരസ്‌കാരം ലഭിച്ചിരുന്നു. പുഷ്പ 2- ദ് റൂള്‍ എന്ന ചിത്രത്തിലെ അഭിനയത്തിനാണ് ഈ ബഹുമതി.

ഗദ്ദര്‍ തെലങ്കാന ഫിലിം അവാര്‍ഡ്‌സിലും പുഷ്പ 2 ലെ പ്രകടനത്തിന് അല്ലു അര്‍ജുന് മികച്ച നടനുള്ള പുരസ്‌കാരം ലഭിച്ചിരുന്നു. 2021 ല്‍ പുഷ്പ-ദ് റൈസ് എന്ന ചിത്രത്തിലെ അഭിനയത്തിനും അല്ലു അര്‍ജുന്‍ മികച്ച നടനുള്ള ദേശീയ ചലച്ചിത്ര പുരസ്‌കാരം നേടിയിരുന്നു. മികച്ച വേഴ്സറ്റൈൽ നടിക്കുള്ള പുരസ്കാരത്തിനായി തിര‍ഞ്ഞെടുത്തിരിക്കുന്നത് സായ് പല്ലവിയെയാണ്.