വിജയ് സേതുപതി നായകനായെത്തിയ മഹാരാജ ചൈനീസ് ബോക്സോഫീസുകളിലും റെക്കോഡുകൾ വാരിക്കൂട്ടുകയാണിപ്പോൾ. ഇപ്പോഴിതാ മഹാരാജ കണ്ട് വികാരഭരിതരായിരിക്കുന്ന ചൈനീസ് പ്രേക്ഷകരുടെ ചിത്രങ്ങളും വിഡിയോകളുമാണ് സോഷ്യൽ മീ‍ഡിയയിൽ നിറയുന്നത്. ചിത്രത്തിലെ ഇമോഷ്ണൽ രം​ഗങ്ങൾ കാണുമ്പോൾ സ്ത്രീകളടക്കം തിയറ്ററിലിരുന്ന് കരയുന്നതും വിഡിയോകളിൽ കാണാം.

'അച്ഛൻ - മകൾ ബന്ധം കാണിക്കുന്ന ഇന്ത്യൻ സിനിമകൾക്ക് ചൈനയിൽ വൻ സ്വീകാര്യതയാണ് ലഭിക്കുന്നത്. ദം​ഗൽ, സീക്രട്ട് സൂപ്പർ സ്റ്റാർ ഇപ്പോൾ മഹാരാജയും' - എന്നാണ് സോഷ്യൽ മീഡിയയിൽ ഭൂരിഭാ​ഗം പേരും കുറിച്ചിരിക്കുന്നത്. ഇന്ത്യയിൽ വലിയ വിജയം നേടിയ മഹാരാജ നവംബർ 29നാണ് ചൈനയിൽ റിലീസ് ചെയ്തത്.

ഒരാഴ്ചയ്ക്കുള്ളിൽ തന്നെ ചിത്രം 40.75 കോടി രൂപ കളക്ഷൻ നേടുകയും ചെയ്തു. ചൈനയിൽ 50 കോടിയിലധികം കളക്ഷൻ നേടുന്ന ആദ്യ തമിഴ് ചിത്രമാണ് മഹാരാജ. ചൈനയിൽ ഇന്ത്യൻ സിനിമകൾക്ക് എപ്പോഴും മികച്ച സ്വീകാര്യത ലഭിക്കാറുണ്ട്. 18,000 സ്ക്രീനുകളിൽ പ്രദർശിപ്പിച്ച ബാഹുബലിയുടെ രണ്ടാം ഭാഗമാണ് ചൈനയിൽ ഏറ്റവും കൂടുതൽ സ്ക്രീനുകളിൽ പ്രദർശിപ്പിച്ച ഇന്ത്യൻ ചിത്രം.

'സുരേഷേട്ടനും രാധി ചേച്ചിക്കുമൊപ്പം'; പഴയകാല നായകനെ കാണാൻ വീട്ടിലെത്തി സുചിത്ര

നിതിലൻ സ്വാമിനാഥൻ സംവിധാനം ചെയ്ത മഹാരാജ കഴിഞ്ഞ വർഷം ജൂൺ 14 നാണ് റിലീസ് ചെയ്തത്. അനുരാ​ഗ് കശ്യപാണ് ചിത്രത്തിൽ വില്ലനായെത്തിയത്.