ബോളിവുഡിലെ മറ്റൊരു സൂപ്പർതാര ചിത്രം കൂടി ഓൺലൈൻ റിലീസിന് ഒരുങ്ങുകയാണ്. വരുൺ ധവാൻ നായകനായി എത്തുന്ന കൂലി നമ്പർ വൺ ആണ് ഒടിടി പ്ലാറ്റ്ഫോമിലൂടെ പ്രേക്ഷകരിൽ എത്തുന്നത്. ഇപ്പോൾ ചിത്രത്തിന്റെ ട്രെയിലർ പുറത്തുവന്നിരിക്കുകയാണ്. കോമഡിയും റൊമാൻസും ആക്ഷനും ഉൾപ്പെടുത്തിക്കൊണ്ടുള്ള ട്രെയിലർ ബോളിവുഡ് സിനിമാപ്രേമികളുടെ മനസു കീഴടക്കുകയാണ്. 

സൂപ്പർഹിറ്റ് ചിത്രം കൂലി നമ്പർ വണ്ണിന്റെ റീമേക്കാണ് ഇത്. ഡേവിഡ് ധവാൻ സംവിധാനം ചെയ്യുന്ന ചിത്രത്തിൽ സാറ അലി ഖാനാണ് നായികയായി എത്തുന്നത്. പരേഷ് റാവൽ, ജാവേദ് ജഫ്രി, ജോണി ലിവർ എന്നിവർ ആണ് മറ്റു പ്രധാന വേഷങ്ങളിൽ എത്തുന്നത്. ഛായാഗ്രഹണം രവി കെ. ചന്ദ്രൻ. 

1995 ലാണ് ​ഗോവിന്ദയേയും കരിഷ്മ കപൂറിനേയും പ്രധാനകഥാപാത്രങ്ങളാക്കി കൂലി നമ്പർ വൺ പുറത്തിറങ്ങിയത്. ഡേവിഡ് ധവാൻ തന്നെയാണ് ചിത്രം സംവിധാനം ചെയ്തത്. 25 വർഷം മുൻപ് ഇറങ്ങിയ ചിത്രത്തിന്റെ പുനഃരാവിഷ്കാരമാണിത്. ചിത്രം ഡിസംബർ 25ന് ആമസോൺ പ്രൈം വഴി റിലീസിനെത്തും.