വൻ ഹൈപ്പോടെയാണ് രജനികാന്ത്- ലോകേഷ് കൂട്ടുകെട്ടിന്റെ കൂലി തിയറ്ററുകളിലെത്തിയത്. ആദ്യ ഷോയ്ക്ക് പിന്നാലെ മറ്റു ഭാഷകളിൽ ചിത്രത്തിന് പോസിറ്റീവ് പ്രതികരണം ലഭിച്ചപ്പോൾ കേരളത്തിൽ നിന്ന് വൻ വിമർശനമാണ് ചിത്രത്തിന് നേരെ ഉയർന്നത്. എന്തൊക്കെയാണെങ്കിലും നെ​ഗറ്റീവ് റിവ്യൂസ് ഒന്നും ചിത്രത്തിന്റെ കളക്ഷനെ തെല്ലും ബാധിച്ചിട്ടില്ലെന്നാണ് പുറത്തുവരുന്ന വിവരം.

151 കോടിയാണ് കൂലി ആദ്യ ദിനം ബോക്സോഫീസിൽ നേടിയത്. ചിത്രത്തിന്റെ നിർമാതാക്കളായ സൺ പിക്ചേഴ്സ് തന്നെയാണ് ഈ വിവരം പുറത്തുവിട്ടിരിക്കുന്നത്. ഒരു തമിഴ് സിനിമ നേടുന്ന ഏറ്റവും വലിയ ആദ്യ ദിന കളക്ഷനാണ് കൂലി നേടിയത്. ഇതോടെ വിജയ് ചിത്രം ലിയോയുടെ റെക്കോർഡാണ് കൂലി തകർത്തത്.

അഡ്വാൻസ് ബുക്കിങ്ങിലും കൂലി തംര​ഗം സൃഷ്ടിച്ചിരുന്നു. തമിഴ്‌നാട്ടിൽ നിന്ന് ആദ്യ ദിനം 28– 30 കോടി രൂപയും, ആന്ധ്ര പ്രദേശ്/തെലങ്കാനയിൽ നിന്ന് 16–18 കോടി രൂപയും, കർണാടകയിൽ നിന്ന് 14–15 കോടി രൂപയും, കേരളത്തിൽ നിന്ന് 10 കോടി രൂപയും, വിദേശ വിപണികളിൽ നിന്ന് 75 കോടി രൂപയും കൂലി നേടിയതായി ട്രേഡ് റിപ്പോർട്ടുകൾ സൂചിപ്പിക്കുന്നു.

ഈ കണക്കുകൾ പ്രകാരം, ഇന്ത്യയിൽ ആദ്യ ദിവസം 76 കോടി രൂപ നേടിയ ലിയോയുടെ റെക്കോർഡ് ചിത്രം മറികടന്നു. രജനികാന്തിനൊപ്പം നാ​ഗാർജുന, ആമിർ ഖാൻ, ഉപേന്ദ്ര, ശ്രുതി ഹാസൻ, സത്യരാജ്, സൗബിൻ ഷാഹിർ എന്നിവരും പ്രധാന വേഷങ്ങളിലെത്തി. അനിരുദ്ധ് രവിചന്ദർ ആണ് ചിത്രത്തിന് സംഗീതമൊരുക്കിയിരിക്കുന്നത്.

ചിത്രത്തിലെ പാട്ടുകളെല്ലാം സോഷ്യൽ മീഡിയയിലും വൻ തരം​ഗം തീർത്തിരുന്നു. ദേവ എന്ന കഥാപാത്രമായി രജനികാന്ത് എത്തിയപ്പോൾ സൈമണായി നാ​ഗാർജുനയും ദാഹയായി ആമിർ ഖാനും കലീഷയായി ഉപേന്ദ്രയും ചിത്രത്തിലെത്തി. രജനികാന്തിന്റെ കരിയറിലെ 171-ാമത്തെ ചിത്രം കൂടിയാണ് കൂലി.