സിനിമാപ്രേമികളെ ഒന്നടങ്കം ആവേശത്തിലാക്കുകയാണ് രജനീകാന്തിന്റെ ജയിലർ. ചിത്രത്തിൽ അതിഥി വേഷത്തിൽ മലയാളത്തിന്റെ പ്രിയനടൻ മോഹൻലാലും എത്തിയിരുന്നു. മിനിറ്റുകൾ മാത്രം ദൈർഘ്യമുള്ള താരത്തിന്റെ മാത്യൂസ് എന്ന കഥാപാത്രം ആരാധകരെ ആവേശംകൊള്ളിക്കുകയാണ്. ഇപ്പോൾ ജയിലറിലെ മോഹൻലാൽ കഥാപാത്രത്തേക്കുറിച്ച് സംവിധായകൻ അൽഫോൺസ് പുത്രൻ പങ്കുവച്ച കുറിപ്പാണ് ശ്രദ്ധനേടുന്നത്. 

മോഹൻലാലിന്റെ ചിത്രത്തിനൊപ്പമാണ് അൽഫോൺസിന്റെ പോസ്റ്റ്. ‘‘ഏതാണ്ട് ഈയൊരു ഫീല്‍ കൊണ്ടുവരാന്‍ പറ്റുമെന്നാണ് എനിക്കു തോന്നുന്നത് ലാലേട്ടാ’’- എന്നാണ് അദ്ദേഹം കുറിച്ചത്. ആരാധകർ ഏറ്റെടുത്തിരിക്കുകയാണ് പോസ്റ്റ്. മോഹൻലാലിനൊപ്പം പുതിയ ചിത്രം ചെയ്യാൻ ആവശ്യപ്പെട്ടുകൊണ്ട് നിരവധി പേരാണ് കമന്റ് ചെയ്യുന്നത്. 

ബീസ്റ്റിന് ശേഷം നെൽസൺ ജയിലറിലൂടെ തിരിച്ചുവന്നതുപോലെ ​ഗോൾഡിന്റെ ക്ഷീണം മാറ്റാൻ മോഹൻലാലിനെവച്ച് മാസ് പടം ചെയ്യാനാണ് ആരാധകർ പറയുന്നത്. നിങ്ങൾ വിചാരിച്ചാൽ നടക്കും..ഇനി നിങ്ങൾ ഉള്ളു..പഴയ വിൻസെന്റ് ഗോമസ് പോലൊരു ഐറ്റം..ലാലേട്ടന്റെ ഇപ്പോഴത്തെ പ്രായത്തിന് പറ്റുന്ന സാധനം.- എന്നായിരുന്നു മറ്റൊരാളുടെ കമന്റ്. 

പ്രേമം വൻ വിജയമായി ഏഴ് വർഷങ്ങൾക്ക് ശേഷമാണ് അൽഫോൺസ് പുത്രൻ ​ഗോൾഡുമായി എത്തിയത്. പൃഥ്വിരാജിനെ നായകനാക്കി എടുത്ത ചിത്രം വൻ പരാജയമായിരുന്നു. ​ഗിഫ്റ്റ് എന്ന സിനിമയാണ് അൽഫോൺസ് ഒരുക്കുന്നത്. ഇളയരാജയാണ് ചിത്രത്തിന് സം​ഗീതസംവിധാനം നിർവഹിക്കുന്നത്. 

ഈ വാര്‍ത്ത കൂടി വായിക്കൂ 

'റോളക്‌സ്' വരുന്നു വീണ്ടും; പുതിയ ചിത്രത്തിന്റെ പ്രഖ്യാപനം ഉടൻ

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ