വളരെ കുറച്ച് സിനിമകളിലേ അഭിനയിച്ചിട്ടുള്ളൂവെങ്കിലും മലയാളി ഒരിക്കലും മറക്കാത്ത പേരുകളിലൊന്നാണ് മയൂരി. മലയാളത്തിലും തമിഴിലുമൊക്കെയായി അഭിനയത്തില്‍ സജീവമായി നില്‍ക്കെയാണ് മയൂരി ജീവനൊടുക്കുന്നത്. മരിക്കുമ്പോള്‍ മയൂരിയുടെ പ്രായം 22 വയസായിരുന്നു. ആകാശഗംഗ, സമ്മര്‍ ഇന്‍ ബത്‌ലഹേം തുടങ്ങിയ സിനിമകളിലൂടെ ഇന്നും മയൂരി പ്രേക്ഷകരുടെ മനസില്‍ ജീവിക്കുകയാണ്.

സമ്മര്‍ ഇന്‍ ബത്‌ലഹേം റീറിലീസിലൂടേയും രണ്ടാം ഭാഗത്തിന്റെ പ്രഖ്യാപനത്തിലൂടെയും വാര്‍ത്തകളില്‍ നിറയുമ്പോള്‍ മയൂരിയേയും ഓര്‍ക്കുകയാണ് ആരാധകര്‍. സമ്മര്‍ ഇന്‍ ബത്‌ലഹേമിന്റെ സംവിധായകന്‍ സിബി മലയില്‍ മയൂരിയെക്കുറിച്ച് പറഞ്ഞ വാക്കുകളും ചര്‍ച്ചയാവുകയാണ്. റീറിലീസ് അനുബന്ധിച്ച് നല്‍കിയ അഭിമുഖത്തിലാണ് അദ്ദേഹം മയൂരിയെക്കുറിച്ച് സംസാരിച്ചത്.

മയൂരിയുടെ വിയോഗം ഞങ്ങളെയെല്ലാം വളരെയധികം ഞെട്ടിച്ചതായിരുന്നു. തീര്‍ത്തും അപ്രതീക്ഷിതം ആയിരുന്നു. പാവം കുട്ടിയായിരുന്നു. ഒരു പ്രശ്‌നങ്ങളുമില്ലാത്ത, വളരെ സൈലന്റ് ആയ കുട്ടിയായിരുന്നു. ഞങ്ങള്‍ക്ക് വല്ലാത്ത ഷോക്കിങ് ആയിരുന്നുവെന്നാണ് സിബി മലയില്‍ പറയുന്നത്. അഭിമുഖത്തില്‍ ഒപ്പമുണ്ടായിരുന്ന നടി ശ്രീജയ നായരും മയൂരിയെക്കുറിച്ച് സംസാരിക്കുന്നുണ്ട്. ഇപ്പോഴും കമന്റുകളിലൂടെ ആളുകള്‍ ചോദിക്കാറുണ്ട്, ആ കുട്ടിയ്ക്ക് എന്താണ് പറ്റിയതെന്ന്. ഒരാളെ മാത്രം മിസ് ചെയ്യാറുണ്ട് എന്നും പറയുന്നവരുണ്ടെന്നും ശ്രീജയ പറയുന്നു.

ബാലതാരമായാണ് മയൂരി കരിയര്‍ ആരംഭിക്കുന്നത്. ആദ്യ സിനിമയില്‍ അഭിനയിക്കുമ്പോള്‍ മയൂരിയ്ക്ക് എട്ട് വയസായിരുന്നു. പിന്നീട് സമ്മര്‍ ഇന്‍ ബത്‌ലഹേമിലൂടെയാണ് മലയാളത്തിലെത്തുന്നത്. ആകാശഗംഗ, അരയന്നങ്ങളുടെ വീട് തുടങ്ങിയ സിനിമകളിലും അഭിനയിച്ചു. 2005 ലായിരുന്നു മയൂരിയുടെ മരണം.