ഡിഎൻഎ സിനിമയുടെ പ്രമോഷനിടെ നടി ഹന്ന റെജി കോശിയോട് യൂട്യൂപ് ചാനൽ അവതാരക മോശമായി പെരുമാറിയത് വലിയ രീതിയിൽ ചർച്ചയായിരുന്നു. സിനിമയിൽ അവസരം കിട്ടാൻ ആരുടെയെങ്കിലും കൂടെ കിടന്നിട്ടുണ്ടോ എന്നായിരുന്നു അവതാരകയുടെ ചോദ്യം. തുടർന്ന് നടി അഭിമുഖം പൂർത്തിയാക്കാതെ ഇറങ്ങിപ്പോന്നിരുന്നു. ഇപ്പോൾ സംഭവത്തിൽ പ്രതികരണവുമായി ഹന്ന തന്നെ രം​ഗത്തെത്തിയിരിക്കുകയാണ്. ചോദ്യം ചോദിച്ച രീതി തന്നെ വേദനിപ്പിച്ചു എന്നാണ് നടി പറഞ്ഞത്. അഭിമുഖം സ്ക്രിപ്റ്റഡ് ആയിരുന്നില്ലെന്നും നടന്നത് പ്രാങ്ക് അല്ലായിരുന്നുവെന്നും താരം വ്യക്തമാക്കി.

എന്തു ചോദിച്ചാലും മറുപടി പറയാമോ എന്ന് അഭിമുഖത്തിനു മുൻപെ അവതാരക ചോദിച്ചിരുന്നു. പക്ഷേ, ഇത്തരമൊരു ചോദ്യം പ്രതീക്ഷിച്ചില്ല എന്നാണ് ഹന്ന പറയുന്നത്. ആ ചോദ്യം ഉചിതമായിരുന്നില്ല. റീച്ച് കിട്ടാൻ വേണ്ടിയായിരിക്കും അവർ അങ്ങനെ ഒരു ചോദ്യം ചോദിച്ചത്. ചോദ്യം ചോദിച്ച രീതി വേദനിപ്പിച്ചു. ആദ്യം പ്രതികരിക്കുന്നില്ലെന്നു കരുതി. പക്ഷേ, എന്റെ നിലപാട് എനിക്ക് വ്യക്തമാക്കണമായിരുന്നു. ആരെങ്കിലും അപര്യാദയായി പെരുമാറുകയാണെങ്കിൽ അതിനോടുള്ള എന്റെ പ്രതികരണം എനിക്ക് പറയണമല്ലോ. എന്തിനാണ് അങ്ങനെ ഒരു ചോദ്യം ചോദിക്കുന്നത്? അതൊരു തെറ്റായ ചോദ്യമല്ലേ? അങ്ങനെയൊരു വ്യക്തിയല്ല ഞാൻ എന്നൊരു കാര്യം എനിക്ക് അവിടെ പറയണമായിരുന്നു. കൂടുതൽ പറഞ്ഞു കുളമാക്കുന്നതിനെക്കാൾ ഇറങ്ങിപ്പോകുന്നതായിരിക്കും ഉചിതമെന്ന് കരുതി.- ഹന്ന പറഞ്ഞു.

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

സംഭവത്തിൽ പ്രതികരണവുമായി ഡിഎൻഎ സിനിമയുടെ നായകൻ അഷ്കർ സൗദാനും രം​ഗത്തെത്തി. ഒരാളോടും ചോദിക്കാൻ പാടില്ലാത്ത ചോദ്യമാണ് ആ അവതാരക ഹന്നയോട് ചോദിച്ചത എന്നാണ് താരം പറഞ്ഞത്. ഇങ്ങനെ ഒരു ചോദ്യം ചോദിക്കുമെന്ന് ഞങ്ങൾക്ക് അറിയില്ലായിരുന്നു. എല്ലാ മേഖലയിലും നല്ലതും ചീത്തയും ഉണ്ട്. ടാലന്റും വ്യക്തിത്വവും കൊണ്ടാണ് ഹന്ന ഈ മേഖലയിൽ നിൽക്കുന്നത് മലയാള സിനിമയിലും ഇന്ത്യൻ സിനിമയിലും നിറഞ്ഞു നിൽക്കുന്ന ഒരുപാട്പേരുണ്ട്. ആരും ഇവർ പറഞ്ഞതുപോലെയല്ലല്ലോ വരുന്നത്. ഇങ്ങനെ ഒരു ചോദ്യം ചോദിച്ചത് ഞങ്ങളെ വളരെയധികം വേദനിപ്പിച്ചു എന്നാണ് അഷ്കർ പറഞ്ഞത്.

ഡിഎൻഎ സിനിമയുടെ പ്രമോഷന്റെ ഭാ​ഗമായുള്ള അഭിമുഖത്തിലാണ് സംഭവമുണ്ടായത്. അവതാരക ആദ്യം ചോദ്യം ചോദിച്ചപ്പോൾ ഹന്ന ഉത്തരം നൽകിയില്ല. പിന്നാലെ താരത്തിന്റെ പേരെടുത്ത് പറഞ്ഞ് വീണ്ടും ചോദ്യം ആവർത്തിക്കുകയായിരുന്നു. സിനിമയിലെ കാസ്റ്റിങ് കൗച്ചിനെക്കുറിച്ച് ചോദിക്കണമെങ്കിൽ അത്തരത്തിലാണ് ചോദിക്കേണ്ടത് എന്ന് പറഞ്ഞാണ് ഹന്ന ഇറങ്ങിപ്പോയത്. അശ്ലീല ചോദ്യം ചോദിച്ചതു കൂടാതെ നടിയോട് വളരെ മോശമായാണ് അവതാരക പെരുമാറിയത്. സോഷ്യൽ മീഡിയയിൽ ഇത് വലിയ രീതിയിലുള്ള വിമർശനങ്ങൾക്ക് കാരണമായിരുന്നു.