മലയാളത്തിലെ യുവനടനുമായുണ്ടായ പ്രണയ പരാജയം കാരണമാണ് തെന്നിന്ത്യൻ സിനിമ ഉപേക്ഷിച്ചതെന്ന് നടി മോണൽ ​ഗജ്ജർ. നടനുമായി കടുത്ത പ്രണയത്തിലായിരുന്നെന്നും വേർപിരിയൽ ജീവിതത്തിൽ മറക്കാൻ പറ്റാത്ത ഒന്നായിരുന്നു എന്നുമാണ് താരം പറയുന്നത്. ബിഗ് ബോസ് തെലുങ്ക് പതിപ്പിൽ നിന്നും പുറത്തായ താരം മാധ്യമങ്ങൾക്കു നൽകിയ അഭിമുഖത്തിലാണ് ഇക്കാര്യം വെളിപ്പെടുത്തിയത്.

‘മലയാളത്തിലെ യുവനടനുമായി കടുത്ത പ്രണയത്തിലായിരുന്നു. എന്നാൽ കാര്യങ്ങൾ നല്ല രീതിയിൽ മുന്നോട്ടു പോയില്ല. ഞങ്ങള്‍ പിരിഞ്ഞു. എന്നാൽ ആ വേര്‍പിരിയൽ ജീവിതത്തിൽ മറക്കാൻ പറ്റാത്ത ഒന്നായിരുന്നു. അതോടെ തെന്നിന്ത്യൻ സിനിമകളിൽ അഭിനയിക്കേണ്ടെന്നു തീരുമാനിച്ചു.’- മോണൽ പറഞ്ഞു. 

ഗുജറാത്തി സ്വദേശിയായ മോണൽ തെന്നിന്ത്യൻ സിനിമകളിലൂടെയാണ് ശ്രദ്ധേയയാവുന്നത്. വിനയൻ സംവിധാനം ചെയ്ത ഡ്രാക്കുള 2012 ലൂടെയാണ് മലയാളത്തിൽ എത്തുന്നത്. സുധീറായിരുന്നു ചിത്രത്തിലെ നായകൻ. മോണലിന്റെ വേഷവും ശ്രദ്ധിക്കപ്പെട്ടിരുന്നു.  തമിഴ്, തെലുങ്ക് സിനിമകളിൽ നിറഞ്ഞു നിൽക്കുമ്പോഴായിരുന്നു താരത്തിന്റെ പിൻമാറ്റം. 

2012 ല്‍ തെലുങ്ക് ചിത്രം സുഡി​ഗഡുവിലൂടെയാണ്  മോണല്‍ ഗജ്ജര്‍ സിനിമയിലേക്ക് എത്തുന്നത്. ഇത് സൂപ്പർഹിറ്റായതോടെ തമിഴിൽ നിന്നു തെലുങ്കിൽ നിന്ന് മികച്ച അവസരങ്ങൾ താരത്തെ തേടിയെത്തി. അഞ്ച് വർഷം അഭിനയത്ത് സജീവമായ താരം പെട്ടെന്ന് സൗത്ത് ഇന്ത്യന്‍ സിനിമകളിൽ നിന്ന് അപ്രത്യക്ഷമായി. 2018 മുതൽ നടി ഗുജറാത്തി സിനിമകളില്‍ മാത്രമാണ് അഭിനയിച്ചത്. അതിനിടെ ഒരു ഹിന്ദി സിനിമയിലും താരം വേഷമിട്ടു. ബിഗ് ബോസ് തെലുങ്ക് നാലാം പതിപ്പിലെ പുതിയ സീസണിലൂടെ നടി വീണ്ടും പ്രേക്ഷക ശ്രദ്ധനേടി. പരിപാടി ഹിറ്റായതോടെ നടിയെ തേടി നിരവധി അവസരങ്ങളാണ് സിനിമാ–സീരിയൽ രംഗത്തുനിന്നും വരുന്നത്.