നിരവധി ചിത്രങ്ങളാണ് നടൻ ദുൽഖർ സൽമാന്റേതായി അണിയറയിൽ ഒരുങ്ങുന്നത്. കാന്താ, ഐ ആം ​ഗെയിം എന്നീ ചിത്രങ്ങളാണ് ദുൽഖറിന്റേതായി സിനിമാ പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രങ്ങൾ. ആർഡിഎക്സിന്റെ സംവിധായകൻ നഹാസ് ഹിദായത്ത് ആണ് ഐ ആം ​ഗെയിം സംവിധാനം ചെയ്യുന്നത്. ജേക്സ് ബിജോയ് ആണ് ചിത്രത്തിന്റെ സം​ഗീത സംവിധാനമൊരുക്കുന്നത്.

ഐ ആം ​ഗെയിമിന്റെയും പുറത്തുവന്ന ചില അപ്ഡേഷനുകൾ ആരാധകരെ ആവേശത്തിലാഴ്ത്തിയിരുന്നു. ഇപ്പോഴിതാ ചിത്രത്തെക്കുറിച്ച് സംസാരിക്കുകയാണ് ജേക്സ് ബിജോയ്. വനിതയ്ക്ക് നൽകിയ അഭിമുഖത്തിലാണ് ജേക്സ് ചിത്രത്തെക്കുറിച്ച് പറഞ്ഞത്.

"നഹാസ് എല്ലാ കാര്യത്തിലും ഒരു ഫയർ ഉള്ള ആളാണ്. എല്ലാ കാര്യത്തിലും, തീപിടിച്ച പോലെയാണ് നടക്കുന്നത്. പാട്ടിന്റെ കാര്യത്തിലാണെങ്കിലും ബാക്ക്​ഗ്രൗണ്ട് സ്കോർ പ്ലാൻ ചെയ്യുന്ന കാര്യത്തിലാണെങ്കിലുമൊക്കെ ഉള്ളിലൊരു ഫയർ ഉള്ളയാളാണ് അദ്ദേ​ഹം. ലോകയുടെ വിജയം ഉള്ളതു കൊണ്ട് തന്നെ അതിന്റെ പോസിറ്റീവ് എനർജി ഉൾക്കൊണ്ടു കൊണ്ടാണ് ദുൽഖർ നിൽക്കുന്നത്.

നിലവിൽ സിനിമയുടെ എടുത്ത സീനുകളെല്ലാം സൂപ്പറായി വന്നിട്ടുണ്ട്. രണ്ട് മുന്ന് എപ്പിസോഡുകൾ ഞാൻ കണ്ടിരുന്നു. നന്നായിരുന്നു, ഇത് ഞാൻ തള്ളുന്നതല്ല. ഇതൊരു സേഫ് ഉത്തരമായിരിക്കുമെന്നാണ് എനിക്ക് തോന്നുന്നത്".- ജേക്സ് ബിജോയ് പറഞ്ഞു.

നഹാസ് ഹിദായത്തിന്റെ കഥയിൽ സജീർ ബാബ, ബിലാൽ മൊയ്‌തു, ഇസ്മായേൽ അബുബക്കർ എന്നിവർ ചേർന്നാണ് ഐ ആം ഗെയിം സിനിമയ്ക്ക് തിരക്കഥ ഒരുക്കുന്നത്. ജിംഷി ഖാലിദ് ഛായാഗ്രഹണം നിർവഹിക്കുന്ന സിനിമയുടെ എഡിറ്റിങ് കൈകാര്യം ചെയ്യുന്നത് ചമൻ ചാക്കോ ആണ്. ആക്ഷന് വലിയ പ്രാധാന്യം ഉള്ള ചിത്രത്തിന്റെ ഹൈലൈറ്റ് അൻപറിവ് മാസ്റ്റേഴ്‌സ് ഒരുക്കുന്ന വമ്പൻ സംഘട്ടന രംഗങ്ങൾ ആയിരിക്കും എന്നാണ് സൂചന.