മലയാളികളുടെ ഇഷ്ട താരമാണ് ജോജു ജോർജ്. ഇപ്പോൾ താരത്തിന്റെ മകൻ ഇവാൻ ജോർജ് അഭിനയത്തിലേക്ക് ചുവടുവച്ചിരിക്കുകയാണ്. പരിപ്പ് എന്ന ഹ്രസ്വചിത്രത്തിലൂടെയാണ് പപ്പു എന്നു വിളിക്കുന്ന ഇവാന്റെ അരങ്ങേറ്റം. 

ആൾക്കൂട്ട മർദനമേറ്റു അട്ടപ്പാടിയിൽ കൊല്ലപ്പെട്ട മധുവിന്റെ ജീവിതത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. ഇവാന്റെ കഥാപാത്രമായ അലി എന്ന കുട്ടിയിലൂടെയാണ് കഥ മുന്നോട്ടുപോകുന്നത്. ഇവാനെ കൂടാതെ ജോജുവിന്റെ മറ്റൊരു മകനായ ഇയാൻ ജോർജും ചിത്രത്തിലുണ്ട്. ജോജുവിന്റെ മകൾ സാറയാണ് ചിത്രത്തിലെ ​ഗാനം ആലപിച്ചിരിക്കുന്നത്. 

ജോജു ജോർജിന്റെ തന്നെ നിർമ്മാണ കമ്പനി ആയ അപ്പു പാത്തു പപ്പു പ്രൊഡക്‌ഷന്റെ ബാനറിൽ ജോജു ജോർജ് തന്നെയാണ് നിര്‍മാണം. സംവിധാനം സിജു എസ്. ബാവ. ഛായാഗ്രഹണം ബിലു ടോം.