ആമിര്‍ ഖാനും കജോളും പ്രധാന വേഷങ്ങളിലെത്തിയ ചിത്രമാണ് ഫന. 2006 ല്‍ പുറത്തിറങ്ങിയ സിനിമയ്ക്ക് ഇന്ന് 20 വയസായിരിക്കുകയാണ്. ചിത്രത്തിന്റെ ഈ നാഴികക്കല്ല് ആഘോഷിക്കുകയാണ് നടി കജോള്‍. സോഷ്യല്‍ മീഡിയയില്‍ പങ്കുവച്ച കുറിപ്പിലൂടെ ഫനയുടെ ചിത്രീകരണ ഓര്‍മകള്‍ പങ്കിടുകയാണ് കജോള്‍.

ചിത്രത്തിലെ ഗാന രംഗം ചിത്രീകരിച്ചത് മൈനസ് 27 ഡിഗ്രി തണുപ്പത്തായിരുന്നുവെന്നാണ് കജോള്‍ പറയുന്നത്. ചിത്രത്തിലെ നായകന്‍ ആമിര്‍ ഖാന്‍ ഉള്‍പ്പടെ മറ്റെല്ലാവരും കോട്ടും സ്യൂട്ടും ധരിച്ച് തണുപ്പില്‍ നിന്നും രക്ഷപ്പെട്ടു നില്‍ക്കുമ്പോഴും തന്റെ വേഷം കട്ടി കുറഞ്ഞ സല്‍വാര്‍ കമീസ് ആയിരുന്നുവെന്നാണ് കജോള്‍ ഓര്‍ക്കുന്നത്.

ഫനയുടെ ചിത്രീകരണത്തിനിടെയുള്ള ചിത്രങ്ങള്‍ പങ്കുവെച്ചു കൊണ്ടായിരുന്നു കജോളിന്റെ കുറിപ്പ്. ''ഫനയ്ക്ക് 20 വയസ്. എന്റെ മകള്‍ക്ക് അന്ന് രണ്ടര വയസായിരുന്നു. പക്ഷെ ഞാന്‍ കൂടുതലും ഓര്‍ക്കുന്നത് പോളണ്ടിന്റെ മനോഹാരിതയാണ്. -27 ഡിഗ്രി സെല്‍ഷ്യസായിരുന്നു. മനോഹരമായ വനം. പിന്നെ എല്ലാവരും അടിമുടി പുതച്ച നില്‍ക്കുമ്പോഴും ഞാന്‍ കട്ടി കുറഞ്ഞൊരു സല്‍വാര്‍ കമീസ് മാത്രമായിരുന്നു ധരിച്ചിരുന്നതെന്നും ഓര്‍ക്കുന്നു' എന്നാണ് കജോള്‍ കുറിച്ചത്.

ആമിര്‍ ഖാനും കജോളിനുമൊപ്പം തബു, ഋഷി കപൂര്‍, കിരണ്‍ ഖേര്‍, ശരത് സക്‌സേന തുടങ്ങിയവരും അഭിനയിച്ച ചിത്രമാണ് ഫന. ചിത്രം ബോക്‌സ് ഓഫീസില്‍ വലിയ വിജയമായിരുന്നു. ഒരിടവേളയ്ക്ക് ശേഷമുള്ള കജോളിന്റെ തിരിച്ചുവരവ് കൂടിയായിരുന്നു ഫന.