മോഹന്‍ലാലിന്റെ മകള്‍ വിസ്മയയും സിനിമയിലേക്ക് കടന്നു വരികയാണ്. ജൂഡ് ആന്റണി ഒരുക്കുന്ന തുടക്കം എന്ന ചിത്രത്തിലൂടെയാണ് വിസ്മയയുടെ അരങ്ങേറ്റം. കഴിഞ്ഞ ദിവസമായിരുന്നു ചിത്രത്തിന്റെ പൂജ നടന്നത്. മോഹന്‍ലാല്‍ കുടുംബസമേതം തന്നെ ചടങ്ങിനെത്തിയപ്പോള്‍ മലയാള സിനിമയിലെ നിരവധി പ്രമുഖരും സാന്നിധ്യമായി.

വിസ്മയയുടെ സിനിമാ എന്‍ട്രിയ്ക്ക് ആശംസകളുമായി മോഹന്‍ലാലിന്റെ അടുത്ത സുഹൃത്തും സംവിധായകനുമായ പ്രിയദര്‍ശനുമെത്തിയിരുന്നു. സോഷ്യല്‍ മീഡിയയിലൂടെയാണ് പ്രിയദര്‍ശന്‍ വിസ്മയയ്ക്ക് ആശംസകള്‍ നേര്‍ന്നത്. വിസ്മയയ്ക്കുള്ള അച്ഛന്റെ ആശംസയ്ക്ക് മകള്‍ കല്യാണി പ്രിയദര്‍ശന്‍ നല്‍കിയ മറുപടി സോഷ്യല്‍ മീഡിയയില്‍ ചിരി പടര്‍ത്തുകയാണ്.

അച്ഛന് ഇന്‍സ്റ്റഗ്രാം അക്കൗണ്ട് ഉണ്ടെന്ന് ഈ നിമിഷം വരെ തനിക്ക് അറിയില്ലായിരുന്നുവെന്നാണ് പ്രിയദര്‍ശന്റെ പോസ്റ്റ് പങ്കിട്ടു കൊണ്ട് കല്യാണി പറയുന്നത്. താന്‍ കള്ളം പറയുകയല്ലെന്നും സത്യമാണെന്നും കല്യാണി പറയുന്നുണ്ട്. അതേസമയം കൂട്ടുകാരിയ്ക്ക് കല്യാണി ആശംസ നേരുകയും ചെയ്യുന്നുണ്ട്. കുട്ടിക്കാലത്തു നിന്നുമുള്ള വിസ്മയയ്‌ക്കൊപ്പമുള്ള ചിത്രം പങ്കിട്ടു കൊണ്ടാണ് കല്യാണിയുടെ ആശംസ.

'ഈ രണ്ടു കുട്ടികളെയും ഞാന്‍ എന്റെ കൈകളില്‍ എടുത്തുകൊണ്ട് നടന്നതാണ്. ഞങ്ങള്‍ അങ്ങനെയൊരു കുടുംബം ആയിരുന്നു. ഇന്ന് മോഹന്‍ലാല്‍ പറഞ്ഞതുപോലെ ഞങ്ങള്‍ ഒരിക്കലും കരുതിയില്ല ഇവര്‍ സിനിമയിലേക്ക് എത്തുമെന്ന്. കല്യാണിക്ക് ലോക ലഭിച്ചതുപോലെ മായയ്ക്കും തുടക്കം ഒരു സുന്ദര തുടക്കം തന്നെയാകട്ടെ. ദൈവം രക്ഷിക്കട്ടെ മായ' എന്നായിരുന്നു പ്രിയദര്‍ശന്‍ വിസ്മയയ്ക്കായി കുറിച്ചത്.