മധുബാല നായികയായെത്തിയ പുതിയ ചിത്രമാണ് 'ചിന്ന ചിന്ന ആസൈ'. വർഷ വാസുദേവ് സംവിധാനം ചെയ്ത ചിത്രത്തിന് മികച്ച അഭിപ്രായമാണ് തിയറ്ററുകളിൽ നിന്ന് ലഭിച്ചു കൊണ്ടിരിക്കുന്നത്. ഒരു നടിയെന്ന നിലയിൽ മാത്രമല്ല, വ്യക്തിപരമായും ഈ സിനിമ വളരെ ആഴത്തിൽ അനുഭവിച്ചുവെന്ന് പറയുകയാണ് മധുബാലയിപ്പോൾ.

മറ്റ് ചില തിരക്കുകളും ഡേറ്റ് പ്രശ്നവും കാരണം രണ്ട് തവണ ഈ സിനിമയിൽ നിന്ന് താൻ ഒഴിഞ്ഞുമാറിയതാണെന്നും എന്നാൽ വർഷ കാത്തിരുന്നുവെന്നും മധുബാല പറഞ്ഞു. കേരള കൗമുദിക്ക് നൽകിയ അഭിമുഖത്തിൽ സംസാരിക്കുകയായിരുന്നു മധുബാല. "വാരാണസി വെറും ഒരു ന​ഗരം മാത്രമല്ല, ഭൂമിയിലെ സ്വർ​ഗമാണ്.

അതിനെ 'ദേവൻമാരുടെ നാട്' എന്ന് വിളിക്കുന്നത് വെറുതെയല്ല. അവിടുത്തെ ഘാട്ടുകളും ​ഗം​ഗാനദിയും എല്ലാം അത്ഭുതകരമായ അനുഭവമായിരുന്നു. മുംബൈ പോലെ തിരക്കേറിയ ന​ഗരജീവിതത്തിൽ നിന്ന് ഞാൻ പൂർണമായും അകന്നു പോയതു പോലെ തോന്നി. മുൻപൊരിക്കലും അനുഭവിക്കാത്ത രീതിയിൽ ഞാൻ ആ സ്ഥലം ആസ്വദിച്ചു.

എവിടെയോ അകലെയിരുന്ന് ധ്യാനിക്കുന്നത് പോലെയായിരുന്നു ആ അനുഭവം. സിനിമയിൽ അഭിനയിക്കുമ്പോഴും ഞാൻ എന്റെ യഥാർഥ വ്യക്തിത്വത്തെയാണ് പ്രകടിപ്പിക്കുന്നതെന്ന് തോന്നി. ക്ഷേത്രങ്ങളുടെയും ആത്മീയതയുടെയും നാടായ വാരാണസി എനിക്ക് മറക്കാനാകാത്ത അനുഭവം സമ്മാനിച്ചു".- മധുബാല പറഞ്ഞു.