അന്ന് രണ്ടര വയസായിരുന്നു തേജസിന് പ്രായം. തന്റെ ഇഷ്ട നായികയായ മഞ്ജു വാര്യരെ കാണാൻ വേണ്ടി വാശിപിടിച്ചു കരഞ്ഞു. വർഷങ്ങൾക്കു ശേഷം മഞ്ജു വാര്യരെ കാണുക മാത്രമല്ല ഒന്നിച്ച് അഭിനയിക്കുകയും ചെയ്തിരിക്കുകയാണ് തേജസ്. പുതിയ ചിത്രം വെള്ളരിക്ക പട്ടണത്തിന്റെ സെറ്റിൽവച്ചാണ് തന്റെ കുട്ടി ആരാധകനെ മഞ്ജു കണ്ടത്. 

ഓഡിഷൻ വഴി സിനിമയിലേക്ക്

ചിത്രത്തിലേക്ക് ഓഡിഷൻ വഴിയാണ് തേജസ് തെരഞ്ഞെടുക്കപ്പെടുന്നത്. ഷൂട്ടിനിടെയാണ് തേജസിന്റെ രണ്ടര വയസിലെ വൈറൽ വിഡിയോ മഞ്ജു കണ്ടത്.  ‘എനിക്ക് മഞ്ജു വാര്യരെ കാണണം’ എന്നു പറഞ്ഞാണ് കുട്ടി തേജസിന്റെ കരച്ചിൽ. കുരുന്നിന്റെ സ്നേഹത്തിനു മുന്നിൽ സ്വതസിദ്ധമായ ചിരി ആയിരുന്നു താരത്തിന്റെ മറുപടി. ഒപ്പം നിർത്തി ഒരു ഫോട്ടോ എടുക്കാനും മറന്നില്ല മഞ്ജു. 

മഞ്ജു വാര്യർക്കൊപ്പം സൗബിനും

അന്ന് കരഞ്ഞെങ്കിലും ഇന്ന് കൂടെ അഭിനയിക്കാൻ പറ്റിയ സന്തോഷത്തിലാണ് ഇപ്പോൾ തേജസ്. ആറു വയസുകാരനാണ് തേജസിപ്പോൾ. മഹേഷ് വെട്ടിയാർ സംവിധാനം ചെയ്യുന്ന ചിത്രത്തിൽ മഞ്ജു വാര്യരിനൊപ്പം സൗബിൻ ഷാഹിറും പ്രധാന വേഷത്തിലെത്തുന്നുണ്ട്. മാധ്യമപ്രവര്‍ത്തകനായ ശരത്കൃഷ്ണയും സംവിധായകനും ചേര്‍ന്നാണ് രചന. അലക്സ് ജെ.പുളിക്കല്‍ ആണ് ഛായാഗ്രഹണം.   മഞ്ജു വാരിയര്‍ക്കും സൗബിനും പുറമേ സലിംകുമാര്‍, സുരേഷ്‌കൃഷ്ണ, കൃഷ്ണശങ്കര്‍, ശബരീഷ് വര്‍മ, ഇടവേള ബാബു, അഭിരാമി ഭാര്‍ഗവന്‍ തുടങ്ങിയവരും അഭിനയിക്കുന്നുണ്ട്.