മോഹൻലാലും പൃഥ്വിരാജും ഒന്നിക്കുന്ന പുതിയ ചിത്രം ബ്രോ ഡാഡിയുടെ ടീസർ പുറത്ത്. അച്ഛനും മകനുമായാണ് ഇരുവരും ചിത്രത്തിൽ അഭിനയിക്കുന്നത്. ലൂസിഫറിന് ശേഷം പൃഥ്വിരാജ് സംവിധാനം ചെയ്യുന്ന ചിത്രമാണിത്. നർമരം​ഗങ്ങൾ ഉൾപ്പെടുത്തിക്കൊണ്ടുള്ള ടീസറിന് മികച്ച അഭിപ്രായമാണ് ലഭിക്കുന്നത്. 

ജോൺ കാറ്റാടിയും ഈശോയും

ജോൺ കാറ്റാടി എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്. ഈ കഥാപാത്രത്തിന്റെ മകൻ ഈശോ ജോൺ കാറ്റാടിയായി പൃഥ്വിരാജും എത്തുന്നു. മീനയാണ് മോഹൻലാലിന്റെ ഭാര്യയായി അഭിനയിക്കുന്നത്. ലാലു അലക്സും ചിത്രത്തിൽ പ്രധാന വേഷത്തിലെത്തുന്നുണ്ട്. കല്യാണി പ്രിയദർശൻ ആണ് നായികയാവുന്നത്. 

റിലീസ് ഹോട്ട് സ്റ്റാറിലൂടെ

ഉണ്ണി മുകുന്ദൻ, സൗബിൻ ഷാഹിർ, ജാഫർ ഇടുക്കി, ജഗദീഷ്, മീന, കല്യാണി പ്രിയദർശൻ, നിഖില വിമൽ, കനിഹ, കാവ്യ എം ഷെട്ടി, മല്ലിക സുകുമാരൻ എന്നിവരാണ് മറ്റ് താരങ്ങൾ. ഹോട്ട്സ്റ്റാറിലൂടെയാണ് ചിത്രം റിലീസ് ചെയ്യുന്നത്. ശ്രീജിത്ത് എൻ, ബിബിൻ ജോർജ് എന്നിവരുടേതാണ് തിരക്കഥ. അഭിനന്ദൻ രാമാനുജം ഛായാഗ്രഹണവും ദീപക് ദേവ് സംഗീത സംവിധാനവും നിർവഹിക്കുന്നു. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമാണം.