ഓരോ ദിവസം കഴിയുന്തോറും മികച്ച അഭിപ്രായം നേടി വിജയ കുതിപ്പ് തുടരുകയാണ് നിവിൻ പോളി ചിത്രം 'ബെത്‌ലഹേം കുടുംബ യൂണിറ്റ്'. ഓണം റിലീസായി എത്തിയ ചിത്രം 100 കോടിയിലേക്ക് അടുക്കുകയാണെന്നാണ് പുറത്തുവരുന്ന വിവരം. മമിത ബൈജുവാണ് ചിത്രത്തിൽ നായികയായെത്തിയിരിക്കുന്നത്.

നിവിന്റെയും മമിതയുടെയും അഭിനയത്തിനും വൻ കയ്യടിയാണ് തിയറ്ററുകളിൽ നിന്ന് ലഭിക്കുന്നത്. റിലീസ് ചെയ്ത് മൂന്ന് ദിവസത്തിനുള്ളിൽ തന്നെ ചിത്രം 60 കോടി കടന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. ആഗോളതലത്തിൽ 61.05 കോടിയാണ് ചിത്രത്തിന്റെ കളക്ഷൻ.

ഇതോടെ 'സർവ്വം മായ'യ്ക്ക് ശേഷം അടുത്ത 100 കോടി ക്ലബ്ബിലേക്ക് നിവിൻ പോളി കടക്കുകയാണ്. മൂന്നാം ദിവസം 1,781 ഷോകളിലായി 8.80 കോടി രൂപയുടെ നെറ്റ് കളക്ഷൻ ആണ് ഇന്ത്യയിൽ നിന്ന് നേടിയത്. സാക്നിൽക്കിന്റെ കണക്കനുസരിച്ച്, ചിത്രം നിലവിൽ ഇന്ത്യയിൽ നിന്ന് 20.85 കോടി രൂപയുടെ നെറ്റ് കളക്ഷൻ നേടിയിട്ടുണ്ട്.

അതേസമയം ഇന്ത്യയിലെ മൊത്തം കളക്ഷൻ 24.35 കോടി രൂപയാണ്. വിദേശത്ത് ഞായറാഴ്ച 11 കോടി രൂപ കൂടി നേടിയതോടെ അന്താരാഷ്ട്ര കളക്ഷൻ 36.70 കോടി രൂപയായി. ഗിരീഷ് എ ഡി സംവിധാനം ചെയ്ത ചിത്രം നിർമിച്ചിരിക്കുന്നത് ഭാവന സ്റ്റുഡിയോസ് ആണ്. സംഗീത് പ്രതാപ്, റോഷൻ ഷാനവാസ്, ശ്യാം മോഹൻ, സുരേഷ് കൃഷ്ണ, വിനയ് ഫോർട്ട്, ശ്രിന്ദ, ബിന്ദു പണിക്കർ, തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.