സുരേഷ് ​ഗോപിയെ നായകനാക്കി ജോഷി ഒരുക്കുന്ന ചിത്രമാണ് പാപ്പൻ. ഏറെക്കാലത്തിനു ശേഷം സുരേഷ് ​ഗോപി പൊലീസ് വേഷത്തിൽ എത്തുകയാണ് ചിത്രത്തിൽ. അതിനൊപ്പം മറ്റൊരു പ്രത്യേകതയും ചിത്രത്തിനുണ്ട്. സുരേഷ് ​ഗോപിയും മകൻ ​ഗോകുലും ആദ്യമായി ഒന്നിക്കുന്ന ചിത്രമാണിത്. ഇപ്പോൾ ഇതാ ചിത്രത്തിലെ മകന്റെ കഥാപാത്രത്തെ പരിചയപ്പെടുത്തുകയാണ് സുരേഷ് ​ഗോപി. 

മകനൊപ്പമുള്ള ചിത്രം പങ്കുവെച്ചുകൊണ്ടാണ് കുറിപ്പ്. മാത്യൂസ് പാപ്പന്‍ ഐപിഎസ് എന്ന എബ്രഹാം മാത്തന്‍ ആയാണ് സുരേഷ് ഗോപി ചിത്രത്തില്‍ എത്തുന്നത്. മൈക്കിള്‍ എന്നാണ് ഗോകുല്‍ സുരേഷ് അവതരിപ്പിക്കുന്ന കഥാപാത്രത്തിന്‍റെ പേര്. കയ്യിലൊരു സി​ഗരറ്റും ​ഗ്ലാസും പിടിച്ചു നിൽക്കുകയാണ് സുരേഷ്​ഗോപി. കൂടെ അച്ഛനെ നോക്കി ചിരിച്ചു നിൽക്കുന്ന ​ഗോകുലിനേയും കാണാം. പുകവലി ആരോ​ഗ്യത്തിന് ഹാനികരം എന്ന മുന്നറിയിപ്പും താരം ചേർത്തിട്ടുണ്ട്. 

 'സലാം കാശ്‍മീരി'നു ശേഷം ജോഷിയും സുരേഷ് ഗോപിയും ഒന്നിക്കുന്ന ചിത്രം ക്രൈം ത്രില്ലര്‍ വിഭാഗത്തില്‍പ്പെടുന്ന ചിത്രമാണ്. 'പൊറിഞ്ചു മറിയം ജോസി'ന്‍റെ വിജയത്തിനു ശേഷം ജോഷി സംവിധാനം ചെയ്യുന്ന ചിത്രം കൂടിയാണിത്. സുരേഷ് ഗോപിയുടെ കരിയറിലെ 252-ാം ചിത്രവുമാണ്. മാത്യൂസ് പാപ്പന്‍റെ മകളും ഐപിഎസ് ഉദ്യോഗസ്ഥയുമായി നീത പിള്ളയാണ് എത്തുന്നത്. പാപ്പന്‍റെ ഭാര്യയായി എത്തുന്നത് നൈല ഉഷയാണ്. സണ്ണി വെയ്‍ന്‍, ആശ ശരത്ത്, കനിഹ, ചന്ദുനാഥ്, വിജയരാഘവന്‍, ടിനി ടോം, ഷമ്മി തിലകന്‍ തുടങ്ങിയവരും കഥാപാത്രങ്ങളായെത്തുന്നു. റേഡിയോ ജോക്കിയും തിരക്കഥാകൃത്തുമായ ആര്‍ജെ ഷാനിന്‍റേതാണ് രചന.