സാധാരണക്കാരുടെ ആവശ്യങ്ങളെക്കുറിച്ചും അവകാശങ്ങളെക്കുറിച്ചുമൊക്കെ നിരന്തരം രാജ്യസഭയിൽ ഉന്നയിക്കുന്ന വ്യക്തിയാണ് രാഘവ് ഛദ്ദ. യുവാക്കളുടെ ഇടയിലും രാഘവിന് വലിയ പിന്തുണയാണുള്ളത്. അപ്രതീക്ഷിതമായാണ് ആം ആദ്മി പാർട്ടിയുടെ ഡെപ്യൂട്ടി ലീഡർ സ്ഥാനത്ത് നിന്നും രാഘവ് ഛദ്ദയെ മാറ്റിയത്.

ഇപ്പോഴിതാ രാഘവിന് പൂർണ പിന്തുണയുമായി എത്തിയിരിക്കുകയാണ് രാഘവിന്റെ ഭാര്യയും നടിയുമായ പരിണീതി ചോപ്ര. അടുത്തിടെ പിതാവെന്ന നിലയിൽ പുരുഷന്മാർക്ക് വേണ്ട മെറ്റേണിറ്റി അവധിയെക്കുറിച്ച് രാജ്യസഭയിൽ രാഘവ് ഛദ്ദ സംസാരിച്ചിരുന്നു. ഇതിനെ പിന്തുണച്ചു കൊണ്ടായിരുന്നു പരിണീതി കുറിപ്പുമായെത്തിയത്.

"എന്റെ പ്രിയപ്പെട്ട ഭർത്താവേ, നിങ്ങൾ ഇന്ന് ഒരു എംപി എന്ന നിലയിൽ മാത്രമല്ല, ഞാൻ എല്ലാ ദിവസവും കാണുന്ന ഒരു അച്ഛനെന്ന നിലയിലുമാണ് സംസാരിച്ചത്. നമ്മള്‍ ഇതിനെക്കുറിച്ച് പലതവണ ചര്‍ച്ച ചെയ്തിട്ടുണ്ട്. നമ്മുടെ കുഞ്ഞുങ്ങൾ മാതാപിതാക്കളുടെ സാന്നിധ്യം എത്ര മാത്രം അർഹിക്കുന്നു. അതിനാൽ നിങ്ങൾ ഇന്ന് സംസാരിച്ചപ്പോൾ, അത് വെറും നയമായിരുന്നില്ല.

നിങ്ങൾ നമ്മുടെ കുട്ടിയെ എങ്ങനെ വളർത്തുന്നു എന്നതിൽ നിന്നാണ് അത് രൂപപ്പെട്ടത്. ചോദിക്കാതെ നിങ്ങൾ കാണിക്കുന്ന സാന്നിധ്യം. രക്ഷാകർതൃത്വം ഒരാൾക്കു മാത്രമല്ല, അത് പങ്കിടപ്പെടുന്നു എന്ന ബോധ്യത്തിൽ നിന്നുമായിരുന്നു നിങ്ങളുടെ ആ വാക്കുകൾ. ഈ ഉത്തരവാദിത്വം ഒറ്റയ്ക്ക് ഏറ്റെടുക്കുന്ന നിരവധി അമ്മമാരുണ്ട്.

പലപ്പോഴും അതാരും കേൾക്കാറുമില്ല, കാണാറുമില്ല. അച്ഛന്റെയും കുടുംബത്തിന്റെയും പിന്തുണ നഷ്ടപ്പെട്ട വീടുകൾ. ഇന്ന്, നിങ്ങൾ അവരുടെ ഏകാന്തതയെ പാർലമെന്റിലേക്ക് കൊണ്ടുവന്നു - അത് ശരിക്കും പ്രാധാന്യമുള്ള ഒരു മുറിയായി മാറി.

ഇത് കുറച്ച് മാതാപിതാക്കൾക്ക്, പ്രത്യേകിച്ച് അമ്മമാർക്ക് കൂടുതൽ പിന്തുണ തോന്നാൻ സഹായിച്ചാൽ, അത് നമ്മുടെ വിജയമായിരിക്കും. അച്ഛനായതിനും - നേതാവായതിനും നന്ദി. ഞാൻ അത് എല്ലാ ദിവസവും കാണുന്നു, ഇനി ഇന്ത്യയും അത് കാണും.

നിന്നെയോർത്ത് എപ്പോഴും അഭിമാനിക്കുന്നു, എന്റെ രാഘായി".- പരിണീതി കുറിച്ചു. 'പാർലമെന്റിൽ സംസാരിക്കാൻ അവസരം ലഭിക്കുമ്പോഴെല്ലാം ഞാൻ പൊതു വിഷയങ്ങൾ ഉന്നയിക്കാറുണ്ട്. സാധാരണയായി പാർലമെന്റിൽ പലരും ഉന്നയിക്കാത്ത വിഷയങ്ങൾ ഞാൻ പറയാറുണ്ട്.

പക്ഷേ പൊതു വിഷയങ്ങൾ ഉന്നയിക്കുന്നത് ഒരു കുറ്റകൃത്യമാണോ ?. ഞാൻ ഒരു കുറ്റകൃത്യം ചെയ്തിട്ടുണ്ടോ? ഞാൻ ചെയ്തത് തെറ്റാണോ ?. എന്ത് പാപമാണ് ചെയ്തത് ?'- എന്ന് ചോദിക്കുന്ന രാഘവ് ഛദ്ദയുടെ വിഡിയോയും വൈറലാണ്. രാജ്യത്തെ ഏറ്റവും പ്രായം കുറഞ്ഞ എംപിമാരിൽ ഒരാളായ രാഘവ് ഛദ്ദ ഡൽഹി മുൻ മുഖ്യമന്ത്രി അരവിന്ദ് കെജരിവാളിന്റെ അടുത്ത വിശ്വസ്തനായിരുന്നു.