കഴിഞ്ഞ വർഷത്തെ ഏറ്റവും വലിയ ഹിറ്റ് ചിത്രങ്ങളിലൊന്നായിരുന്നു കൽക്കി 2898 എഡി. നാ​ഗ് അശ്വിൻ സംവിധാനം ചെയ്ത ചിത്രത്തിൽ പ്രഭാസ് ആണ് നായകനായെത്തിയത്. അമിതാഭ് ബച്ചൻ, കമൽ ഹാസൻ എന്നിവരുൾപ്പെടെയുള്ള വലിയ താരങ്ങളും ചിത്രത്തിൽ അണിനിരന്നു. ചിത്രത്തിൽ സുമതി എന്ന നായിക കഥാപാത്രമായി നടി ദീപിക പദുക്കോൺ ആണെത്തിയത്.

എന്നാൽ ചിത്രത്തിന്റെ രണ്ടാം ഭാ​ഗത്തിൽ നിന്ന് ദീപിക പിന്മാറിത് വലിയ വാർത്തയായി മാറിയിരുന്നു. നിർമാതാക്കാളുമായുണ്ടായ അഭിപ്രായ വ്യത്യാസങ്ങളെ തുടർന്നാണ് ദീപിക ചിത്രത്തിൽ നിന്ന് പിന്മാറിയതെന്നാണ് റിപ്പോർട്ടുകൾ. കൽക്കിയിലെ ഏറ്റവും പ്രധാനപ്പെട്ട വേഷത്തിൽ നിന്ന് ദീപിക പിന്മാറിയതോടെ ആരായിരിക്കും ആ റോളിലേക്ക് വരുക എന്ന ചർച്ചയും ആരാധകർക്കിടയിൽ നടന്നിരുന്നു.

നടിമാരായ ആലിയ ഭട്ടിന്റെയും പ്രിയങ്ക ചോപ്രയുടെയുമൊക്കെ പേര് ഇക്കൂട്ടത്തിൽ ഉയർന്നു വന്നിരുന്നു. ഇപ്പോഴിതാ പ്രിയങ്ക തന്നെയായിരിക്കും ഈ വേഷം ചെയ്യുക എന്ന് ഉറപ്പിക്കുകയാണ് ആരാധകരും സിനിമാ പ്രേക്ഷകരും. അണിയറപ്രവർത്തകരാരും ഇക്കാര്യം സ്ഥിരീകരിച്ചിട്ടില്ലെങ്കിലും പ്രിയങ്കയ്ക്ക് തന്നെയാണ് മുൻ​ഗണന എന്നാണ് ആരാധകർ പറയുന്നത്.

എന്നാൽ എസ് എസ് രാജമൗലി ചിത്രം വാരാണസിയുടെ ഷൂട്ടിങ് പൂർത്തിയായാൽ മാത്രമേ പ്രിയങ്കയ്ക്ക് കൽക്കി 2വിന്റെ ഭാ​ഗമാകാൻ കഴിയുകയുള്ളൂ. ആദ്യ ഭാ​ഗത്തിന്റെ തുടർച്ചയായിരുന്നിട്ടു കൂടി രണ്ടാം ഭാ​ഗത്തിൽ മറ്റൊരു നായികയെ അണിയറപ്രവർത്തകർ എങ്ങനെ അവതരിപ്പിക്കുമെന്നാണ് ആരാധകർ ഉറ്റു നോക്കുന്നത്.

ഈ വർഷം ചിത്രീകരണം ആരംഭിക്കാനിരുന്ന കൽക്കി 2 വിന്റെ ഷൂട്ട് അടുത്ത വർഷത്തേക്ക് മാറ്റിയിരിക്കുകയാണ്. ഫൗജി, സ്പിരിറ്റ് എന്നീ സിനിമകളുടെ തിരക്കുകൾ കാരണം പ്രഭാസിനെ ആദ്യ ഷെഡ്യൂളിൽ ലഭ്യമാകില്ലെന്നും മറ്റ് അഭിനേതാക്കളെ വച്ച് ഷൂട്ട് ആരംഭിക്കുകയും ചെയ്യുമെന്നാണ് പുറത്തുവരുന്ന റിപ്പോർട്ട്.

അമിതാഭ് ബച്ചന്റെയും കമൽ ഹാസന്റെയും രം​ഗങ്ങൾ ചിത്രീകരിക്കുമെന്നും റിപ്പോർട്ടുണ്ട്. മഹാനടി എന്ന ചിത്രത്തിന് ശേഷം നാ​ഗ് അശ്വിൻ സംവിധാനം ചെയ്ത ചിത്രമാണ് കൽക്കി. 650 കോടി ബജറ്റിലാണ് ചിത്രം ഒരുക്കിയിരിക്കുന്നത്. 1000 കോടിയിലേറെ ചിത്രം ബോക്സോഫീസിൽ കളക്ട് ചെയ്യുകയും ചെയ്തു. 2027 ൽ ചിത്രത്തിന്റെ രണ്ടാം ഭാ​ഗം റിലീസ് ചെയ്യുമെന്നാണ് വിവരം.