ബോളിവുഡിൽ വീണ്ടും വിവാഹനാളുകൾ വരികയാണ്. നടൻ രാജ്കുമാർ റാവുവും നടി പത്രലേഖയും വിവാഹിതരാവുന്നു എന്നതാണ് പുതിയ വാർത്ത. ഇരുവരും ഏറെ നാളായി പ്രണയത്തിലായിരുന്നു. ഈ മാസം വിവാഹമുണ്ടാകുമെന്നാണ് പുറത്തുവരുന്ന റിപ്പോർട്ടുകൾ. എന്നാൽ വിവാഹിരാകുന്നുവെന്ന കാര്യം പത്രലേഖയോ രാജ്‍കുമാര്‍ റാവുവോ ഇതുവരെ ഔദ്യോഗികമായി സ്ഥിരീകരിച്ചിട്ടില്ല.

ആറു വർഷത്തെ പ്രണയം

നവംബർ 10, 11, 12 തീയതികളിൽ ആയിരിക്കും ഇരുവരുടെയും വിവാഹ ചടങ്ങുകള്‍ എന്നാണ് റിപ്പോര്‍ട്ട്. വളരെ ലളിതമായിട്ടായിരിക്കും ചടങ്ങുകള്‍ എന്നുമാണ് ഇ ടൈംസ് റിപ്പോർട്ട് ചെയ്യുന്നത്. സിനിമയിലെ അടുത്ത സുഹൃത്തുക്കളോട് വിവാഹത്തെക്കുറിച്ച് അറിയിച്ചതായും പറയുന്നുണ്ട്. അടുത്ത ബന്ധുക്കളും സുഹൃത്തുക്കളും മാത്രമാകും ചടങ്ങിൽ പങ്കെടുക്കുക. രാജ്കുമാർ റാവുവും പത്രലേഖയും ആറ് വർഷമായി പ്രണയത്തിലാണ്. ഒന്നിച്ചുള്ള നിമിഷങ്ങൾ ഇരുവരും സോഷ്യൽ മീഡിയയിലൂടെ പങ്കുവയ്ക്കാറുണ്ട്. ബോളിവുഡിലെ മികച്ച പ്രണയജോഡികളായാണ് ഇരുവരേയും വിലയിരുത്തുന്നത്. 

ബോളിവുഡിൽ ഇനി കല്യാണ നാളുകൾ

രാജ്കുമാർ റാവുവിനേയും പത്രലേഖയേയും കൂടാതെ ബോളിവുഡിലെ രണ്ട് പ്രണയജോഡികൾ കൂടി വിവാഹത്തിന് ഒരുങ്ങുന്നുണ്ട്. രൺബീർ കപൂറിന്റേയും ആലിയ ഭട്ടിന്റേയും വിവാഹം ഡിസംബറിലുണ്ടാകുമെന്നാണ് റിപ്പോർട്ടുകൾ. കൂടാതെ വിക്കി കൗശാലും കത്രീന കൈഫും ഈ വർഷം തന്നെ വിവാഹിതരാകുമെന്നും റിപ്പോർട്ടുകളുണ്ടായിരുന്നു. 

രാജ്കുമാര്‍ റാവുവിന്റെ നായികയായി സിറ്റി ലൈറ്റ്‌സിലൂടെയാണ് പത്രലേഖ സിനിമയിലേക്ക് അരങ്ങേറുന്നത്. ഹം ദോ ഹമാരേ ദോയെന്ന ചിത്രമാണ് രാജ്‍കുമാര്‍ റാവുവിന്റേതായി ഏറ്റവും ഒടുവില്‍ പുറത്തിറങ്ങിയത്. രാജ്‍കുമാര്‍ റാവു നായകനായ ചിത്രം നിര്‍മിച്ചിരിക്കുന്നത്  ദിനേശ് വിജൻ ആണ്.