ഭാഷയുടെ അതിര്‍ വരമ്പുകള്‍ മറികടന്ന്, ബോക്‌സ് ഓഫീസില്‍ പുതിയ ചരിത്രം കുറിക്കുകയാണ് ഋഷഭ് ഷെട്ടിയുടെ കാന്താര. ഋഷഭ് തന്നെ സംവിധാനം ചെയ്യുകയും നായകനായി അഭിനയിക്കുകയും ചെയ്ത കാന്താര ചാപ്റ്റര്‍ 1 ആദ്യ ഭാഗത്തേക്കാളും വലിയ വിജയമായി മാറിയിരിക്കുകയാണ്. കേരളത്തിലും ചിത്രത്തിന് വലിയ സ്വീകരണമാണ് ലഭിക്കുന്നത്.

കാന്താരയുടെ വിജയത്തിന്റെ ആഘോഷങ്ങള്‍ക്കിടെ അമിതാഭ് ബച്ചന്‍ അവതാരകനായ കോന്‍ ബനേഗ കറോര്‍പതിയിലും അതിഥിയായി എത്തിയിരിക്കുകയാണ് ഋഷഭ് ഷെട്ടി. പരിപാടിയിലേക്കുള്ള ഋഷഭിന്റെ എന്‍ട്രിയാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്. മലയാളത്തിന്റെ മോഹന്‍ലാലിന്റെ ഡയലോഗ് പറഞ്ഞു കൊണ്ട് മുണ്ടു മടക്കിക്കുത്തുന്ന ഋഷഭ് ഷെട്ടിയുടെ വിഡിയോ സോഷ്യല്‍ മീഡിയയില്‍ വൈറലാവുകയാണ്.

താന്‍ മാസ് സിനിമകളുടെ വലിയ ആരാധകനാണെന്നും ബച്ചനും മോഹന്‍ലാലുമൊക്കെ തന്റെ പ്രിയപ്പെട്ട നടന്മാരാണെന്നും ഋഷഭ് നേരത്തേയും പറഞ്ഞിട്ടുണ്ട്. തന്റെ ഒരു ഐഡലിന് മുന്നില്‍ മറ്റൊരു ഐഡലിനെ അനുകരിച്ചു കൊണ്ട് തന്റെ ഉള്ളിലെ ഫാന്‍ ബോയിയെ പുറത്ത് കൊണ്ടു വരികയാണ് ഋഷഭ് ഷെട്ടി. ലാലേട്ടന്റെ സ്റ്റൈലില്‍ 'എന്താ മോനേ ദിനേശാ' എന്ന് ചോദിച്ചു കൊണ്ടാണ് ഋഷഭ് മുണ്ട് മടക്കിക്കുന്നത്. വിഡിയോയ്ക്ക് താഴെ മലയാളികളും മോഹന്‍ലാല്‍ ആരാധകരും ഒഴുകിയെത്തുന്നുണ്ട്.

അതേസമയം 500 കോടിയും കടന്ന് 600 കോടിയിലേക്ക് അടുക്കുകയാണ് കാന്താര ചാപ്റ്റര്‍ 1 ന്റെ കളക്ഷന്‍. ചിത്രം 1000 കോടി കടക്കുമെന്നാണ് കരുതപ്പെടുന്നത്. ആദ്യ ഭാഗത്തിലെ പ്രകടനത്തിന് ഋഷഭിനെ തേടി മികച്ച നടനുള്ള ദേശീയ പുരസ്‌കാരമെത്തിയിരുന്നു. ഹോംബാലെ ഫിലിംസ് നിര്‍മിച്ച സിനിമ കേരളത്തിലെത്തിച്ചത് പൃഥ്വിരാജ് പ്രൊഡക്ഷന്‍സായിരുന്നു. രുക്മിണി വസന്ത്, ജയറാം, തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്.