മലയാളത്തിലെ എക്കാലത്തേയും മികച്ച ചിത്രങ്ങളിൽ ഒന്നാണ് സന്ദേശം. ശ്രീനിവാസന്റെ തിരക്കഥയിൽ സത്യൻ അന്തിക്കാട് സംവിധാനം ചെയ്ത ചിത്രം ഇന്നും മലയാളി സിനിമപ്രേക്ഷകർക്കിടയിൽ ചർച്ച ചെയ്യപ്പെടാറുണ്ട്. ചിത്രത്തിൽ ശ്രീനിവാസന്റേയും ജയറാമിന്റേയും അനിയന്റെ റോളിൽ എത്തിയത് രാഹുൽ ലക്ഷ്മൺ ആയിരുന്നു. മികച്ച കഥാപാത്രമായിരുന്നെങ്കിലും പിന്നീട് നമ്മൾ രാഹുലിനെ കണ്ടില്ല. ഇന്ന് അറിയപ്പെടുന്ന ഒരു ഡോക്ടറാണ് അദ്ദേഹം. ഇപ്പോൾ 32 വർഷത്തിനുശേഷം സിനിമയിലേക്ക് തിരിച്ചെത്താൻ ഒരുങ്ങുകയാണ് താരം. 

തിരക്കഥകൃത്ത് എസ്എൻ സ്വാമി സംവിധാനം ചെയ്യുന്ന പുതിയ സിനിമയിലൂടെയാണ് രാഹുൽ ലക്ഷ്മൺ തിരിച്ചുവരുന്നത്. നിർമാതാവ് എൻഎം ബാദുഷയാണ് വാർത്ത പുറത്തുവിട്ടത്. 

എന്റെ കൂടെ നിൽക്കുന്ന ആളെ മനസിലായോ മറ്റാരുമല്ല സത്യൻ അന്തിക്കാട് സംവിധാനം ചെയ്ത മലയാള സിനിമയിലെ എക്കാലത്തേയും മികച്ച ആക്ഷേപഹാസ്യചിത്രം " സന്ദേശം" എന്ന സിനിമയിൽ ജയറാമേട്ടന്റെയും ശ്രീനിയേട്ടന്റെയും അനിയനായി അഭിനയിച്ച രാഹുൽ ലക്ഷ്മൺ ഇദ്ദേഹം ഇപ്പോൾ അറിയപ്പെടുന്ന ഒരു ഡോക്ടറാണ്, കഴിഞ്ഞ 32 വർഷത്തിന് ശേഷം വീണ്ടും ക്യാമറക്ക് മുന്നിൽ എത്തുന്നു SN സ്വാമി സംവിധാനം ചെയ്യുന്ന ചിത്രത്തിലൂടെ. ഇനിയും അദ്ദേഹത്തിന് ഒരുപാട് നല്ല കഥാപാത്രങ്ങൾ ചെയ്യുവാൻ സാധിക്കട്ടെ എന്ന് ആശംസിക്കുന്നു.- രാഹുലിനൊപ്പമുള്ള ഫോട്ടോ പങ്കുവച്ചുകൊണ്ട് ബാദുഷ കുറിച്ചു. 

തമിഴ് ബ്രാഹ്മണ പശ്ചാത്തലത്തിലൊരുങ്ങുന്ന പ്രണയകഥയിൽ ധ്യാൻ ശ്രീനിവാസനാണ് നായകനായി എത്തുന്നത്. ഇനിയും പേരിട്ടിട്ടില്ലാത്ത ചിത്രത്തിന്റെ നിർമാണം പി. രാജേന്ദ്ര പ്രസാദാണ്. മകന്‍ ശിവ്റാമും സഹ സംവിധായകനായി ഒപ്പമുണ്ട്. 

ഈ വാര്‍ത്ത കൂടി വായിക്കൂ

'പുഷ്പയില്‍ രശ്മിക മന്ദാനയ്ക്ക് പകരം ഞാനായിരുന്നെങ്കില്‍ കൂടുതല്‍ നന്നായേനെ'; ഐശ്വര്യ രാജേഷ്

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ