മുംബൈ: അന്തരിച്ച നടന്‍ സിദ്ധാര്‍ഥ് ശുക്ലയ്ക്ക് ഒരാഴ്ചയ്ക്കിടെ ഇന്‍സ്റ്റഗ്രാമില്‍ പത്ത് ലക്ഷം ഫോളോവേഴ്‌സിന്റെ വര്‍ധന. മരിക്കുന്നതുവരെ നടന് ഇന്‍സ്റ്റഗ്രാമില്‍ 35 ലക്ഷം ഫോളോവേഴ്‌സാണ് ഉണ്ടായിരുന്നത്. മരിച്ച് ഒരാഴ്ച  പിന്നിടുമ്പോഴെക്കും അത് നാല്‍പ്പത്തിനാല് ലക്ഷമായി വര്‍ധിച്ചു.

സെപ്റ്റംബര്‍ രണ്ടിനാണ് നടനും ബിഗ്‌ബോസ് 13 വിജയിയുമായ സിദ്ധാര്‍ഥ് മുംബൈയിലെ കൂപ്പല്‍ ആശുപത്രിയില്‍ വച്ച് മരിച്ചത്. ഹൃദയാഘാതത്തെ തുടര്‍ന്നായിരുന്നു മരണം. 

മോഡലിങ്ങിലൂടെയാണ് സിദ്ധാര്‍ഥ് വിനോദ രംഗത്ത് പ്രവേശിക്കുന്നത്. പിന്നീട് ഒട്ടനവധി ടെലിവിഷന്‍ ഷോകളില്‍ മത്സരാര്‍ഥിയായും അവതാരകനുമായെത്തി. ബിഗ് ബോസ് 13 പതിപ്പ് വിജയിയായത് കരിയറില്‍ വഴിത്തിരിവായി. ബിസിനസ് ഇന്‍ റിതു ബാസാര്‍, ഹംപ്റ്റി ശര്‍മ ഹി ദുല്‍ഹനിയ തുടങ്ങിയ ചിത്രങ്ങളില്‍ വേഷമിട്ടു. ബ്രോക്കണ്‍ ബട്ട് ബ്യൂട്ടിഫുള്‍ 3 എന്ന വെബ് സീരീസില്‍ അഭിനയിച്ചു വരികയായിരുന്നു.