സൂര്യ നായകനായെത്തുന്ന റെട്രോ അടുത്ത മാസം തിയറ്ററുകളിലെത്തുകയാണ്. കഴിഞ്ഞ ദിവസം ചിത്രത്തിന്റെ ഓഡിയോ, ട്രെയ്‌ലർ ലോഞ്ചും നടന്നിരുന്നു. കാർത്തിക് സുബ്ബരാജ് ആണ് ചിത്രം സംവിധാനം ചെയ്യുന്നത്. ഇപ്പോഴിതാ റെട്രോയുടെ ചിത്രീകരണത്തിനിടെ നടൻ സൂര്യയ്ക്ക് തലയ്ക്ക് പരിക്കേറ്റെന്ന് വെളിപ്പെടുത്തിയിരിക്കുകയാണ് നടൻ നാസർ. റെട്രോ ഓഡിയോ, ട്രെയ്‌ലർ ലോഞ്ചിൽ സംസാരിക്കുകയായിരുന്നു അദ്ദേഹം.

"സൂര്യയെ, അദ്ദേഹത്തിന്റെ ആദ്യ സിനിമ മുതൽ തന്നെ കാണുകയും അദ്ദേഹത്തിന്റെ വളർച്ചയ്ക്ക് സാക്ഷ്യം വഹിക്കുകയും ചെയ്ത ഒരാളാണ് ഞാൻ. അദ്ദേഹം വളരെ ശുദ്ധമായ മനസിന് ഉടമയാണ്. അതിലെല്ലാമുപരി അദ്ദേഹം തന്റെ കലയോട് അങ്ങേയറ്റം പ്രതിബദ്ധത പുലർത്തുന്ന ഒരാൾ കൂടിയാണ്.

ശരിക്കും പറഞ്ഞാൽ ഈ സിനിമയിൽ ഇത്രയധികം റിസ്ക് എടുക്കുന്നത് കണ്ടിട്ട് എനിക്ക് സൂര്യയോട് ദേഷ്യം തോന്നി. ഇത്രയും അപകടകരമായ രം​ഗങ്ങൾക്ക് എന്തുകൊണ്ട് ഒരു ഡ്യൂപ്പിനെ ഉപയോ​ഗിച്ച് കൂടാ എന്ന് ഞാൻ സൂര്യയോട് ചോദിച്ചു. വേണ്ട സാറേ, ആദ്യം ഞാൻ തന്നെ അത് ചെയ്തു നോക്കട്ടെ. എനിക്ക് അത് ചെയ്യാൻ പറ്റുന്നില്ലെങ്കിൽ, ഞാൻ പകരം ആരെയെങ്കിലും നോക്കാം.

കുറഞ്ഞത് രണ്ടോ മൂന്നോ തവണയെങ്കിലും ശ്രമിക്കണം. പിന്നീട് സിനിമ കാണുമ്പോൾ, അത് ശരിക്കും ഞാൻ തന്നെയായിരുന്നുവെന്ന് എനിക്ക് തോന്നണം എന്നാണ് സൂര്യ അതിന് മറുപടി പറഞ്ഞത്". - നാസർ പറഞ്ഞു. ഷൂട്ടിങ്ങിനിടെ സൂര്യയുടെ തലയ്ക്ക് പിന്നിലേറ്റ പരിക്കിനേക്കുറിച്ചും നാസർ സംസാരിച്ചു.

"തലയ്ക്ക് പരിക്കേറ്റിട്ടും, അദ്ദേഹം വളരെ കുറച്ച് സമയം മാത്രമേ ബ്രേക്ക് എടുത്തുള്ളൂ. പിന്നീട് അദ്ദേഹം ഷൂട്ടിങ് തുടങ്ങാനായി സെറ്റിലെത്തി. സൂര്യ, എനിക്ക് നിനക്ക് ഒരു ഉപദേശം തരാനുണ്ട്. ഇനിയും ഒരുപാട് കാലം നിന്നെ ഞങ്ങൾക്ക് ആവശ്യമുണ്ട്. അതുകൊണ്ട് ദയവായി ശ്രദ്ധിക്കുക".- നാസർ കൂട്ടിച്ചേർത്തു.

'എന്റെ ആദ്യ എഡിറ്റർ, അടുത്ത സുഹൃത്ത്, ഒരുമിച്ച് ഒരുപാട് സിനിമകൾ ചർച്ച ചെയ്തിട്ടുണ്ട്'

പൂജ ഹെഗ്‌ഡെയാണ് ചിത്രത്തിൽ നായികയായെത്തുന്നത്. മലയാളി താരങ്ങളായ ജോജു ജോർജ്, ജയറാം, സുജിത് ശങ്കർ എന്നിവരും ചിത്രത്തിൽ പ്രധാന വേഷത്തിലെത്തുന്നുണ്ട്. സന്തോഷ് നാരായണനാണ് സംഗീത സംവിധാനം നിർവഹിച്ചിരിക്കുന്നത്.