തണ്ണീർ മത്തൻ ദിനങ്ങളിലൂടെ പ്രേക്ഷക ശ്രദ്ധ നേടിയ താരങ്ങളാണ് മാത്യു തോമസും നസ്ലന്‍ ഗഫൂറും. ഇരുവരും വീണ്ടും ഒന്നിക്കുകയാണ്. നവാ​ഗതനായ അരുണ്‍ ഡി ജോസ് സംവിധാനം ചെയ്യുന്ന 'ജോ ആന്റ് ജോ ' എന്ന സിനിമയിലാണ് ഇരുവരും അഭിനയിക്കുന്നത്. നിഖില വിമലും സിനിമയിൽ പ്രധാന വേഷത്തിലെത്തുന്നുണ്ട്. ഇപ്പോൾ സിനിമയുടെ ചിത്രീകരണത്തിന് തുടക്കമായിരിക്കുകയാണ്. 

കൂത്താട്ടുകുളത്താണ് ജോ ആന്റ് ജോയുടെ ചിത്രീകരണം ആരംഭിച്ചത്. ഇമാജിന്‍ സിനിമാസ്, സിഗ്‌നേച്ചര്‍ സ്റ്റുഡിയോസ് എന്നീ ബാനറുകളില്‍ നിര്‍മ്മിക്കുന്ന ചിത്രത്തില്‍ ജോണി ആന്റണി, സ്മിനു സിജോയ് എന്നിവരും ശ്രദ്ധേയമായ കഥാപാത്രങ്ങളെ അവതരിപ്പിക്കുന്നുണ്ട്.

അരുണ്‍ ഡി. ജോസ്, രവീഷ് നാഥ് എന്നിവര്‍ ചേര്‍ന്ന് തിരക്കഥ സംഭാഷണമെഴുതുന്ന ഈ ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത് അള്‍സര്‍ ഷായാണ്. ടിറ്റോ തങ്കച്ചന്റെ വരികള്‍ക്ക് ഗോവിന്ദ് വസന്തയാണ് സംഗീതം പകരുന്നത്. ചിത്രസംയോജനം നിര്‍വഹിക്കുന്നത് ചമന്‍ ചാക്കോയാണ്.