തെലുങ്ക് സൂപ്പര്‍താരം അല്ലു അര്‍ജുന്റെ വീടിനു നേരെ ആക്രമണത്തിന് പിന്നാലെ വീട് വിട്ട് കുടുംബം. അല്ലു അര്‍ജുന്റെ ഭാര്യ സ്‌നേഹ റെഡ്ഡിയും മക്കളായ അയാനും അര്‍ഹയുമാണ് ജൂബിലി ഹില്‍സിലെ വീട് വിട്ടത്. ആക്രമണം നടക്കുമ്പോള്‍ നടന്‍ വീട്ടിലുണ്ടായിരുന്നില്ല. ആക്രമണം നടന്ന് മണിക്കൂറുകള്‍ക്ക് ശേഷം സ്‌നേഹവും മക്കളും കാറില്‍ വീട്ടില്‍ നിന്ന് ഇറങ്ങുകയായിരുന്നു.

സംഭവത്തില്‍ പ്രതികരണവുമായി നടന്റെ അച്ഛന്‍ അല്ലു അരവിന്ദ് എത്തി. ഇന്ന് ഞങ്ങളുടെ വീട്ടില്‍ നടന്നത് എന്താണ് എന്ന് എല്ലാവരും കണ്ടു. ഇതിനെക്കുറിച്ച് പ്രതികരിക്കേണ്ട സമയമാണ് ഇതെന്ന് ഞാന്‍ കരുതുന്നില്ല. പൊലീസ് അക്രമം നടത്തിയവരെ അറസ്റ്റ് ചെയ്യുകയും കേസെടുക്കുകയും ചെയ്തിട്ടുണ്ട്. വീടിനു നേരെ പ്രശ്‌നങ്ങളുണ്ടാകാതിരിക്കാന്‍ പൊലീസ് ഉദ്യോഗസ്ഥരെ നിയമിച്ചിട്ടുണ്ട്. ഇത്തരം ആക്രമണങ്ങളെ ആരും പ്രോത്സാഹിപ്പിക്കരുത്.- അല്ലു അരവിന്ദ് പറഞ്ഞു.

ഇന്നലെയാണ് നടന്റെ വീടിനു നേരെ ആക്രമണമുണ്ടായത്. പുഷ്പ 2 റിലീസിംഗ് ദിനത്തില്‍ തിരക്കില്‍പ്പെട്ട് മരിച്ച രേവതിക്ക് നീതി ആവശ്യപ്പെട്ടാണ് സംഘം വീട് ആക്രമിച്ചു. ഉസ്മാനിയ സര്‍വകലാശാലയിലെ സമര സമിതിയാണ് പ്രതിഷേധത്തിന് നേതൃത്വം നല്‍കിയത്. ഒരു കോടി രൂപ നഷ്ടപരിഹാരം ആവശ്യപ്പെട്ടായിരുന്നു പ്രതിഷേധം. ഗേറ്റ് ചാടിക്കടന്ന സംഘം വീടിന് നേരെ കല്ലും തക്കാളികളും എറിഞ്ഞു. ചെടിച്ചട്ടികള്‍ തല്ലിപ്പൊളിച്ചു. സുരക്ഷാ ജീവനക്കാരെ കയ്യേറ്റം ചെയ്തു. പത്തോളം പേരാണ് വീട് അതിക്രമിച്ചു കയറിയത്. സംഭവത്തില്‍ എട്ട് പേര്‍ അറസ്റ്റിലായിട്ടുണ്ട്.